काठमाडौं-सरकारले चालु आर्थिक वर्ष २०८२/८३ का लागि विनियोजन गरेको बजेट पूर्ण रूपमा खर्च नहुने संकेत देखिएको छ। अर्थ मन्त्रालयले सार्वजनिक गरेको अर्धवार्षिक समीक्षा प्रतिवेदनअनुसार कुल बजेटको करिब ८५.९६ प्रतिशत मात्र खर्च हुने संशोधित अनुमान गरिएको छ।
चालु आवका लागि सरकारले १९ खर्ब ६४ अर्ब ११ करोड रुपैयाँ बराबरको बजेट ल्याएको थियो। तर आर्थिक वर्षको अन्त्यसम्म १६ खर्ब ८८ अर्ब ३२ करोड रुपैयाँ मात्रै खर्च हुने प्रक्षेपण गरिएको अर्थमन्त्री रामेश्वर खनालले जानकारी दिएका छन्।
संशोधित अनुमानअनुसार चालु खर्चतर्फ ११ खर्ब २५ अर्ब ९७ करोड, पूँजीगत खर्चतर्फ २ खर्ब ४३ अर्ब ३० करोड तथा वित्तीय व्यवस्थातर्फ ३ खर्ब १९ अर्ब ४ करोड रुपैयाँ खर्च हुने अपेक्षा गरिएको छ।
मूल विनियोजनअनुसार चालु खर्चका लागि ११ खर्ब ८० अर्ब, पूँजीगततर्फ ४ खर्ब ७ अर्ब र वित्तीय व्यवस्थातर्फ ३ खर्ब ७५ अर्ब छुट्याइएको थियो। तर पुस मसान्तसम्मको तथ्यांक हेर्दा चालु खर्च लक्ष्यको ४१.२५ प्रतिशत, पूँजीगत खर्च १२.१२ प्रतिशत र वित्तीय व्यवस्थातर्फ ४०.९५ प्रतिशत मात्र खर्च भएको छ।
यद्यपि, सरकारको वार्षिक आर्थिक वृद्धि दर ६ प्रतिशत पुग्ने लक्ष्य भने यथावत् राखिएको छ।