काठमाडौं, २१ भदौ। रसुवाको भोटेकोशी नदीमा भदौ १० गते आएको बाढीमा परी मृत्यु भएका २४४ जनाको शव त्रिभुवन विश्वविद्यालय शिक्षण अस्पताल, महाराजगञ्ज ल्याइएको छ। तीमध्ये १६१ शवको अस्थायी व्यवस्थापन गरिएको छ भने २४ शव पहिचान गरी परिवार तथा आफन्तको जिम्मा लगाइएको छ।

शिक्षण अस्पतालका फरेन्सिक ल्याब प्रमुख डा. गोपाल चौधरीका अनुसार ५९ शव अझै अस्पतालमै रहेका छन्। केही शवको पोस्टमार्टम गर्न बाँकी रहेकाले आवश्यक प्रक्रिया पूरा गरेपछि ती शवको पनि व्यवस्थापन गरिनेछ।

भोटेकोशी बाढीमा ठूलो जनधनको क्षति भएपछि मृत्यु भएकाहरूको शव पहिचान तथा व्यवस्थापनका लागि शिक्षण अस्पताल ल्याइएको हो। पहिचान भएका शव सम्बन्धित परिवार तथा आफन्तलाई बुझाउने प्रक्रिया भइरहेको अस्पतालले जनाएको छ।

शवको संख्या बढ्दै गएपछि अस्पतालमा शव राख्ने स्थानको अभावसमेत देखिएको थियो। त्यसपछि शवको अस्थायी तथा वैकल्पिक व्यवस्थापनको प्रक्रिया अघि बढाइएको हो।