काठमाडौं : भदौ ११ गतेदेखि काठमाडौंमा सुरु हुन गइरहेको १८औं संस्करणको नाडा अटो शोमा नेपालकै पुँजी र इन्जिनियरिङमा तयार भएको ‘यात्री’ को इलेक्ट्रिक स्कुटरसहित डेढ दर्जन बढी नयाँ दुईपाङ्ग्रे सवारी साधन सार्वजनिक हुने भएका छन्।

यस वर्षको अटो शोमा ११ कम्पनीका १२ वटा ब्रान्डले आफ्ना नयाँ उत्पादन प्रदर्शन गर्दैछन्। प्रदर्शनीको सबैभन्दा ठूलो आकर्षण नेपालमै बनेको ‘यात्री पी–२’ स्कुटर हुनेछ। ‘मेड इन नेपाल’ पवेलियनमा राखिने यो स्कुटरमार्फत यात्रीले स्वदेशी सीप र प्रविधिलाई बढावा दिएको छ।

अटो शोमा अन्य प्रतिष्ठित ब्रान्डहरुले पनि आ–आफ्ना नयाँ मोडलहरु सार्वजनिक गर्ने तयारी गरेका छन्। एमएडब्लु राइड्स प्रालिले यामाहाका एक्सएसआरसहित चार नयाँ मोडल अटो शोमार्फत सार्वजनिक गर्दैछ। त्यसैगरी, सीजी मोटर्सले हिरो ब्रान्डका तीन नयाँ मोडल—१६० सीसीको जुम स्कुटर, १२५ सीसीको एक्सट्रिम १२५ आर मोटरसाइकल र २५० सीसीको एक्सपल्स मोटरसाइकल बजारमा ल्याउँदैछ। सीजीले नै आफ्नो विद्युतीय ब्रान्डअन्तर्गत नयाँ स्कुटर र डर्ट मिनी मोटरसाइकल पनि प्रदर्शन गर्ने जनाएको छ।

रोयल इन्फिल्डको आधिकारिक बिक्रेता अल्फा अटोमोटिभले पनि भर्खरै बजारमा ल्याएको नयाँ क्लासिक मोडल अटो शोमा प्रदर्शनका लागि राख्ने भएको छ। यसबाहेक सुजुकी, टिभिएस, बजाज, होन्डा, एप्रिलिया, भेस्पा लगायतका अन्य प्रमुख दुईपाङ्ग्रे ब्रान्डहरुको पनि मेलामा सक्रिय सहभागिता रहनेछ।

नाडा अटो शोमा एकैपटक यति धेरै नयाँ मोडल सार्वजनिक हुनुले नेपाली दुईपाङ्ग्रे सवारी बजारमा नयाँ उत्पादन, विद्युतीय सवारी र स्थानीय एसेम्बलीतर्फ बढ्दो आकर्षणलाई संकेत गरेको छ। एउटै छानामुनि विभिन्न ब्रान्डका सवारी साधन र तिनका फिचरहरु तुलना गर्न पाइने भएकाले अवलोकनकर्ता र सम्भावित खरिदकर्ताका लागि यो मेला निकै फलदायी हुने अपेक्षा गरिएको छ।