काठमाडौं । नेपाल शैक्षिक परामर्श संघ (इक्यान) ले भोटेकोशी क्षेत्रलगायत देशका विभिन्न भागमा आएको बाढी र प्राकृतिक विपद्‌बाट प्रभावितहरूको राहतका लागि १५ लाख १ हजार रुपैयाँ सहयोग गर्ने घोषणा गरेको छ। विपद्‌को घडीमा मानवीय सेवालाई प्राथमिकता दिँदै इक्यानले भदौ १३ गते तय भएको आफ्नो ३०औं स्थापना दिवस (ECAN Day Celebration) को कार्यक्रमसमेत स्थगित गरेको छ।

इक्यानले  आज मा जारी गरेको प्रेस विज्ञप्ति अनुसार, उक्त राहत रकममध्ये इक्यान केन्द्रीय कोषबाट १० लाख १ हजार र केन्द्रीय कार्यसमितिका पदाधिकारी तथा सदस्यहरूको संयुक्त योगदानबाट ५ लाख रुपैयाँ उपलब्ध गराइनेछ। यो प्रारम्भिक सहयोग रकम सरकारमार्फत सञ्चालन हुने ‘प्रधानमन्त्री राहत कोष’मा जम्मा गरिने संस्थाले जनाएको छ। यसअघि यही भदौ १३ गते (२९ अगस्ट २०२६) काठमाडौंको होटल एभरेष्टमा वार्षिकोत्सव समारोह आयोजना हुने तय भएको थियो, जसलाई अर्को सूचना जारी नभएसम्मका लागि स्थगित गरिएको हो।

रसुवा, नुवाकोट, गोरखा, चितवनलगायतका क्षेत्रमा विपद्‌ले पुर्‍याएको मानवीय र भौतिक क्षतिप्रति गहिरो दुःख व्यक्त गर्दै संस्थाले उत्सवभन्दा उद्धार र राहतलाई प्राथमिकतामा राखेको जनाएको छ। विज्ञप्तिमा भनिएको छ, “आज उत्सव स्थगित गरेका छौं, तर हाम्रो सामाजिक दायित्व स्थगित भएको छैन।”।

महासचिव भवनाथ हुमागाईंद्वारा हस्ताक्षरित विज्ञप्तिमा आफ्ना सम्पूर्ण सदस्यहरू, शैक्षिक परामर्श व्यवसायी, विश्वविद्यालय तथा सम्पूर्ण सरोकारवालाहरूलाई राष्ट्रिय राहत अभियानमा स्वेच्छिक रूपमा हातेमालो गर्न हार्दिक अपील गरिएको छ। विपद्‌मा ज्यान गुमाउनेहरूप्रति श्रद्धाञ्जली र बेपत्ता नागरिकहरू शीघ्र सम्पर्कमा आउने कामना गर्दै इक्यानले संकलित थप सहयोग रकमसमेत पारदर्शी रूपमा सरकारको सम्बन्धित निकायमार्फत हस्तान्तरण गरिने स्पष्ट पारेको छ।