काठमाडौँ । प्रधानमन्त्री बालेन्द्र शाह (बालेन) ले आफ्नो चल–अचल सम्पत्तिको विवरण सार्वजनिक गरेका छन् । प्रधानमन्त्री तथा मन्त्रिपरिषद्को कार्यालयले आइतबार सार्वजनिक गरेको मन्त्रिपरिषद् सदस्यहरूको सम्पत्ति विवरणअनुसार प्रधानमन्त्री शाहको मुख्य आम्दानीको स्रोत सामाजिक सञ्जाल देखिएको छ ।

सार्वजनिक विवरणअनुसार प्रधानमन्त्री शाहको विभिन्न बैंक खातामा गरी कुल १ करोड ४६ लाख रुपैयाँ मौज्दात रहेको छ । इन्जिनियरिङ पेसा र कन्सल्टेन्सीभन्दा पनि डिजिटल प्लेटफर्मबाट हुने कमाइलाई उहाँले बैंक ब्यालेन्सको प्रमुख स्रोतका रूपमा उल्लेख गरेका छन् ।

काठमाडौँ महानगरपालिकाको मेयर हुँदादेखि नै सामाजिक सञ्जालमा बलियो उपस्थिति जनाउनुभएका शाहको डिजिटल सञ्जाल निकै फराकिलो छ । उनको फेसबुकमा करिब ४० लाख, युट्युबमा १२ लाख र एक्स (ट्विटर) मा ५ लाखभन्दा बढी फलोअर्स रहेका छन् । सोही प्लेटफर्महरूबाट हुने मोनिटाइजेसन र विज्ञापनबापतको रकम उनको मुख्य बैंकिङ आम्दानीको आधार बनेको देखिन्छ ।

सम्पत्ति विवरणमा प्रधानमन्त्री शाहको नाममा भन्दा उहाँको परिवारका सदस्यका नाममा अचल सम्पत्ति र गरगहना बढी देखिएको छ । विवरणअनुसार उहाँकी पत्नी सविना काफ्लेको नाममा १९० तोला सुन, चाँदी तथा हिराका गरगहना रहेका छन् । यसको प्राप्तिको स्रोत ‘पैतृक’ (माइती खलकबाट प्राप्त) उल्लेख गरिएको छ ।

त्यस्तै, घरजग्गा तर्फ प्रधानमन्त्रीकी आमा धुव्र देवी शाहको नाममा काठमाडौँमा ५ आना र धनुषामा १.२ विघा जग्गा रहेको छ । यस्तै, उनका बुबाको नाममा महोत्तरीमा ९ विघा जग्गा रहेको विवरणमा खुलाइएको छ ।

प्रधानमन्त्री शाहको व्यक्तिगत नाममा भने कुनै पनि घरजग्गा नरहेको सार्वजनिक विवरणले देखाएको छ । सरकारले पारदर्शिताका लागि मन्त्रिपरिषद्का सदस्यहरूको सम्पत्ति विवरण सार्वजनिक गर्ने परम्पराअनुसार यो विवरण सार्वजनिक गरेको हो ।