काठमाडाै-  गृहमन्त्री सुदन गुरुङले आफ्नो चल–अचल सम्पत्तिको विवरण सार्वजनिक गर्नुभएको छ । चैत २९ गते सार्वजनिक गरिएको विवरणअनुसार गृहमन्त्री गुरुङसँग ८९ तोला सुन, ६ किलो चाँदी र विभिन्न कम्पनीहरूमा ४ करोड ३१ लाख रुपैयाँभन्दा बढीको शेयर लगानी रहेको देखिएको छ ।

बहुमूल्य धातु र नगद

सार्वजनिक विवरणअनुसार मन्त्री गुरुङसँग विलासी धातुको ठूलो हिस्सा रहेको छ । उहाँको स्वामित्वमा ८९ तोला सुन र ६ किलोग्राम चाँदी रहेको उल्लेख छ । यी सम्पत्तिको मुख्य स्रोत व्यवसाय र पुर्ख्यौली आर्जन भएको उनले दाबी गरेका छन् ।

घरजग्गा र पुर्ख्यौली सम्पत्ति

घरजग्गा तर्फ गृहमन्त्रीको नाममा धनकुटामा १९ रोपनी १५ आना जग्गा रहेको छ, जुन लगानीमार्फत खरिद गरिएको विवरणमा उल्लेख छ । यसबाहेक उनको परिवारका नाममा पनि उल्लेख्य अचल सम्पत्ति रहेको देखिएको छ:

• चितवन: भरतपुर–१८ मा बुबा दिलबहादुर गुरुङको नाममा ३० कठ्ठा जग्गा ।

• गोरखा: चुमनुब्रीमा बाजे रामसाल गुरुङको नाममा २२१ रोपनी अविभाजित पुर्ख्यौली जग्गा ।

शेयर बजारमा ठूलो लगानी

मन्त्री गुरुङको ठूलो आर्थिक हिस्सा शेयर बजार र निजी कम्पनीहरूमा केन्द्रित देखिएको छ । उहाँको कुल शेयर लगानी ४ करोड ३१ लाख ५६ हजार २०० रुपैयाँ रहेको छ ।

जसमध्ये, होप होल्डिङ्स प्रालि, लगुम प्रिमियम अपार्टमेन्ट प्रालि र एड्भेन्चर भिल्ला प्रालि जस्ता निजी कम्पनीहरूमा उहाँको मुख्य हिस्सेदारी रहेको छ । त्यस्तै, दोस्रो बजार (Publicly Traded Stocks) मा मात्रै उहाँको २ करोड ७४ लाख ५६ हजार २०० रुपैयाँ बराबरको शेयर लगानी रहेको विवरणमा खुलाईएको छ ।

गृहमन्त्री गुरुङले यी सम्पत्तिहरूको आधार व्यवसायिक आम्दानी र पुर्ख्यौली सम्पत्ति रहेको उल्लेख गर्नुभएको छ । सार्वजनिक पदधारण गरेका व्यक्तिले पारदर्शिताका लागि सम्पत्ति विवरण सार्वजनिक गर्नुपर्ने कानुनी प्रावधान बमोजिम उनले यो विवरण सार्वजनिक गरेका हुन्  ।