काठमाडौं – लेबनानमा इजरायलले गरेको हालसम्मकै भीषण हवाई आक्रमणमा २५० भन्दा बढी मानिसको ज्यान गएको छ भने एक हजारभन्दा बढी घाइते भएका छन्। हिज्बुल्लाहसँगको जारी द्वन्द्वबीच भएको यो आक्रमणलाई पछिल्लो समयकै सबैभन्दा घातक मानिएको छ।

अन्तर्राष्ट्रिय सञ्चारमाध्यमका अनुसार बुधबार भएको आक्रमणमा कम्तीमा २५४ जनाको मृत्यु भएको जनाइएको छ। लेबनानको स्वास्थ्य मन्त्रालयले भने हालसम्म १८२ जनाको मृत्यु पुष्टि गरेको छ, यद्यपि मृतक संख्या अझ बढ्न सक्ने बताइएको छ। राजधानी बेरुतमा मात्रै ९० भन्दा बढी मानिसको ज्यान गएको छ।

इजरायली सेनाले १० मिनेटभित्र बेरुत, बेका उपत्यका र दक्षिणी लेबनानका १०० भन्दा बढी लक्ष्यमा समन्वित आक्रमण गरेको जनाएको छ। लगातार भएका विस्फोटका कारण आकाशमा धुवाँको मुस्लो देखिएको थियो भने धेरै भवन ध्वस्त भएका छन्।

आक्रमणपछि उद्धार कार्य प्रभावित भएको छ। एम्बुलेन्स अभावका कारण घाइतेलाई मोटरसाइकलमार्फत अस्पताल पुर्‍याइएको स्थानीय सञ्चारमाध्यमले जनाएका छन्। अस्पतालहरूले रगत अभाव भएको भन्दै सहयोगको अपिल गरेका छन्।

यसैबीच, हिज्बुल्लाहले पनि उत्तरी इजरायलतर्फ रकेट आक्रमण गरेको दाबी गरेको छ। उसले इजरायलले आक्रमण नरोक्दासम्म प्रतिकार जारी राख्ने चेतावनी दिएको छ।

संयुक्त राष्ट्रसंघका मानव अधिकार प्रमुखले उक्त घटनालाई ‘अविश्वसनीय र भयावह नरसंहार’ भन्दै चिन्ता व्यक्त गरेका छन्। यस घटनाले क्षेत्रीय युद्धविराम प्रयासमाथि गम्भीर चुनौती थपिएको विश्लेषण गरिएको छ।