काठमाडौं– इरानविरुद्धको युद्ध दोस्रो महिनामा पुगेसँगै, यमनका हुथीहरूले पहिलो पटक इजरायलमाथि आक्रमण गरेका छन्। अमेरिका र इजरायली सेनाले इरानमाथि आक्रमण सुरु गरेको एक महिनापछि यो कदम चालिएको हो, जसले तीव्र रूपमा बढिरहेको द्वन्द्वमा नयाँ मोर्चा थपेको छ। यस द्वन्द्वले हजारौँ मानिसको ज्यान लिएको, लाखौँलाई विस्थापित बनाएको र विश्व अर्थतन्त्रलाई असर पु¥याएको छ।

उत्तरी यमनको ठूलो भाग नियन्त्रणमा राख्ने हुथीहरूले शनिबार २४ घण्टाभन्दा कम समयमा इजरायलमाथि दुईवटा मिसाइल र ड्रोन आक्रमण गरेका थिए। इजरायली सेनाले ती आक्रमणहरू निष्क्रिय बनाएको जनाएको छ, तर इरानसँग निकट सम्बन्ध राख्ने उक्त समूहले “प्यालेस्टाइन, लेबनान, इराक र इरानका प्रतिरोधी मोर्चाहरू”को समर्थनमा लडाइँ जारी राख्ने वाचा गरेको छ।

यसअघि हुथीहरू यो द्वन्द्वमा सहभागी भएका थिएनन्, जुन गाजामा इजरायलले गरेको युद्धका बेला उनीहरूको भूमिकाभन्दा फरक हो। त्यतिबेला उनीहरूले रातो समुद्रमा जहाजहरूमा आक्रमण गरेर वार्षिक करिब १ ट्रिलियन डलर बराबरको व्यापारिक आवागमनमा असर पारेका थिए।

हालको द्वन्द्वमा उनीहरूको बहुप्रतीक्षित संलग्नता त्यतिबेला आएको हो, जब इरानले विश्वको करिब पाँचौं भाग तेल पार हुने महत्त्वपूर्ण मार्ग होर्मुज जलडमरूमध्यमा आवागमन सीमित गरेको छ। यसले यमनको उक्त समूहले फेरि बाब अल–मन्देब जलडमरूमध्य बन्द गरेर रातो समुद्रको यातायात अवरुद्ध गर्ने आशंका बढाएको छ।

यमनको राजधानी सानाबाट रिपोर्ट गर्दै अल जजीराका युसेफ माव्रीले बाब अल–मन्देबलाई उक्त समूहको “सबैभन्दा बलियो हतियार” भनेर वर्णन गरेका छन्। उनले भने, “उनीहरू इजरायललाई आर्थिक रूपमा मूल्य चुकाउन बाध्य बनाउन चाहन्छन्। उनीहरू व्यापार मार्ग अवरुद्ध गर्न चाहन्छन्। उनीहरू इजरायल भित्रिने र बाहिरिने आयात–निर्यातमा अवरोध ल्याउन चाहन्छन्।”