काठमाडौं  – सन् २०२६ को सुरुआतसँगै नेपालको पर्यटन क्षेत्रमा अत्यन्त उत्साहजनक संकेत देखिएको छ। जनवरी महिनामा मात्र नेपालले ९२ हजार ५७३ अन्तर्राष्ट्रिय पर्यटक स्वागत गरेको तथ्यांक सार्वजनिक भएको छ, जुन अघिल्लो वर्षको सोही अवधिको तुलनामा १५.७ प्रतिशतले वृद्धि हो। अझ महत्वपूर्ण कुरा के भने, यो आगमन संख्या कोभिड–१९ महामारीपूर्व सन् २०१९ को जनवरी महिनाभन्दा पनि १४ प्रतिशतले बढी रहेको छ। यसले नेपालले महामारीपछि पर्यटन पुनरुत्थान मात्र नभई पुरानो स्तर पार गर्दै नयाँ उचाइतर्फ अघि बढिरहेको स्पष्ट संकेत गर्छ।

यो वृद्धिले अन्तर्राष्ट्रिय बजारमा नेपालप्रतिको विश्वास बलियो बन्दै गएको देखाउँछ। प्राकृतिक सौन्दर्य, हिमाल, सांस्कृतिक विविधता, धार्मिक सम्पदा र साहसिक गतिविधिको अद्वितीय संयोजनले नेपाललाई फेरि विश्वभरका यात्रुका लागि आकर्षक गन्तव्य बनाइरहेको छ।

पर्यटक स्रोत बजारका हिसाबले भारत नेपालका लागि सबैभन्दा ठूलो बजारका रूपमा कायम रहेको छ। जनवरीमा मात्र भारतबाट २६ हजार ६२४ पर्यटक नेपाल आएका छन्, जुन कुल आगमनको २८.८ प्रतिशत हो। त्यसपछि चीनबाट ९ हजार १०१ (९.८%), संयुक्त राज्य अमेरिकाबाट ८ हजार ४०६ (९.१%), बंगलादेशबाट ५ हजार ८१४ (६.३%) र अष्ट्रेलियाबाट ४ हजार ९५७ (५.४%) पर्यटक नेपाल भित्रिएका छन्। यी तथ्यांकले देखाउँछन् कि नेपाल छिमेकी बजारसँगै टाढाका विकसित मुलुकहरूमा पनि उत्तिकै लोकप्रिय बन्दै गएको छ।

क्षेत्रगत रूपमा हेर्दा, दक्षिण एशियाली मुलुकहरू (सार्क) बाट सबैभन्दा बढी, ३९.३ प्रतिशत पर्यटक नेपाल आएका छन् भने अन्य एशियाली देशबाट २६.१ प्रतिशत आगमन भएको छ। युरोपबाट १२.३ प्रतिशत, अमेरिकाजबाट १०.८ प्रतिशत र ओसियानियाबाट ५.७ प्रतिशत पर्यटक नेपाल आएका छन्। साथै मध्यपूर्व (१%), अफ्रिका (०.४%) र अन्य क्षेत्रको ४.५ प्रतिशत हिस्सा रहेको छ। यसले नेपाल विश्वका विभिन्न भू–भागबाट आउने पर्यटकको साझा गन्तव्य बन्दै गएको प्रमाणित गर्छ।

नेपाल पर्यटन बोर्डका प्रमुख कार्यकारी अधिकृत दीपकराज जोशीका अनुसार पछिल्ला वर्षहरूमा गरिएको गन्तव्य प्रवर्द्धन, अन्तर्राष्ट्रिय हवाई सम्पर्क विस्तार, साहसिक र सांस्कृतिक पर्यटनको प्रवर्द्धन तथा नेपालको सकारात्मक छवि निर्माणले यी उपलब्धि सम्भव भएका हुन्। उनका भनाइमा यी तथ्यांकहरूले नेपाललाई बिस्तारै ‘लाइफटाइम एक्सपिरियन्स डेस्टिनेसन’ का रूपमा स्थापित गर्दै लगेको छ।