• आइतबार, ७ मंसिर २०८३
  • लुम्बिनीलाई १० विकेटले हराउँदै सुदूरपश्चिम रोयल्स बन्यो एनपीएल च्याम्पियन

    लुम्बिनीलाई १० विकेटले हराउँदै सुदूरपश्चिम रोयल्स बन्यो एनपीएल च्याम्पियन

    सबलनेपाल संवाददाता
    मंसिर ६ २०८३, शनिबार
    लुम्बिनी लायन्सलाई १० विकेटले हराउँदै सुदूरपश्चिम रोयल्सले तेस्रो संस्करणको नेपाल प्रिमियर लिग (एनपीएल) को उपाधि जितेको छ। कीर्तिपुरस्थित त्रिवि अन्तर्राष्ट्रिय क्रिकेट मैदानमा शनिबार सम्पन्न फाइनल खेलमा साविक विजेता लुम्बिनीलाई एकतर्फी रूपमा पराजित गर्दै सुदूरपश्चिम पहिलो पटक च्याम्पियन बनेको हो।
    लुम्बिनीले दिएको १ सय ५६ रनको लक्ष्य सुदूरपश्चिमले एक विकेट पनि नगुमाई मात्र १३ दशमलव ३ ओभरमा पूरा गर्‍यो। सुदूरपश्चिमको सानदार जितमा ओपनर जर्ज मन्सेले ५४ बलमा ८ चौका र १२ छक्कासहित अविजित १ सय २५ रनको विस्फोटक शतकीय इनिङ्स खेले। उनलाई विनोद भण्डारीले २७ बलमा अविजित ३० रन बनाएर साथ दिए।
    यसअघि टस हारेर पहिले ब्याटिङ गरेको लुम्बिनीले निर्धारित २० ओभरमा ६ विकेट गुमाएर १ सय ५५ रन बनाएको थियो। लुम्बिनीका लागि दिलिप नाथले अविजित ३९ र कप्तान रोहितकुमार पौडेलले ३० रन बनाए। बलिङतर्फ सुदूरपश्चिमका स्कट कुगेलेइनले २ विकेट लिए।
    लगातार तीनै संस्करणको फाइनलमा पुगेको सुदूरपश्चिमले यसअघिका दुई फाइनलमा भोगेको हारको पीडा बिर्साउँदै यसपटक उपाधि उचाल्न सफल भएको हो।


    फेसबुक प्रतिक्रिया
    सम्बन्धित समाचार
    नयाँ अपडेट

    Copyright © All right reserved to sabalnepal.com Site By: sobij