उक्त सम्झौताअनुसार अब बिरामीले घरमै होम नर्सिङ, चिकित्सकीय परामर्श, फिजियोथेरापी तथा पुनर्स्थापना सेवा प्राप्त गर्न सक्नेछन्। यसका साथै घरमै ल्याब नमुना संकलन, पोस्ट–अपरेटिभ केयर (शल्यक्रियापछिको हेरचाह), फलोअप तथा मासिक स्वास्थ्य परीक्षण सेवा पनि उपलब्ध हुनेछ। यसबाट विशेषगरी अस्पतालबाट डिस्चार्ज भएर नियमित हेरचाह चाहिने बिरामी, ज्येष्ठ नागरिक, दीर्घरोगी र अस्पतालसम्म आउन–जान कठिन हुने व्यक्तिहरू बढी लाभान्वित हुने विश्वास लिइएको छ।

त्यसैगरी, घरमै स्वास्थ्य सेवा लिइरहेका बिरामीलाई थप विशेषज्ञ उपचार वा अस्पताल भर्ना गर्नुपर्ने अवस्था देखिएमा नर्भिक अस्पतालमा सहज रेफरल तथा समन्वयको व्यवस्थासमेत मिलाइएको छ। दुई संस्थाबीचको यस सहकार्यले बिरामीलाई अवस्थाअनुसार समयमै आवश्यक उपचार पाउन सहज हुने अपेक्षा गरिएको छ। सहकार्यअन्तर्गत स्वास्थ्यकर्मीको तालिम र बिरामी हेरचाहसम्बन्धी ज्ञान आदान–प्रदानमा पनि दुवै संस्थाले समन्वय गर्नेछन्।

पछिल्लो समय अध्ययन र रोजगारीका लागि युवापुस्ता विदेशिने क्रम बढेसँगै स्वदेशमा रहेका वृद्ध आमाबुबालाई बिरामी पर्दा अस्पतालसम्म पुग्न निकै कठिन हुने गरेको छ। यही बाध्यतालाई मध्यनजर गर्दै हेल्थ एट होमले लामो समयदेखि घरमै स्वास्थ्य सेवा दिँदै आएको छ। नर्भिक अस्पतालका संस्थापक अध्यक्ष वसन्त चौधरीले २५ वर्षअघि नै विदेशमा रहेका नेपालीका वृद्ध आमाबुबा तथा आफन्तलाई लक्षित गरी ‘प्यारेन्ट वेलनेस’ कार्यक्रम सुरु गरेका थिए। हाल सोही सेवालाई हेल्थ एट होमसँगको सहकार्यमा थप परिष्कृत गरी निरन्तरता दिइएको अस्पतालले जनाएको छ।