काठमाडौं । विद्युतीय सवारी र नयाँ प्रविधिका गाडीहरूको बृहत् प्रदर्शनीसहित ‘नाडा नेपाल मोबिलिटी एक्स्पो २०२६’ काठमाडौंको भृकुटीमण्डपमा सुरु भएको छ। सवारीसाधनलाई विलासिताको वस्तुका रूपमा नभई आवश्यकताका रूपमा हेर्नुपर्ने सन्देशसहित सुरु भएको एक्स्पोको पहिलो दिन मंगलबार २१ हजारभन्दा बढीले अवलोकन गरेका छन्।

नेपाल अटोमोबाइल्स डिलर्स एसोसिएसन (नाडा) द्वारा आयोजित यस महाकुम्भको उद्घाटन समारोहमा सरकारी अधिकारीहरूले पेट्रोलियम पदार्थको परनिर्भरता घटाउन विद्युतीय सवारीसाधनको प्रयोग बढाउनुपर्नेमा जोड दिएका छन्। सरकारले चार्जिङ स्टेसनलगायतका पूर्वाधार निर्माणमा सहजीकरण गर्ने प्रतिबद्धतासमेत जनाएको छ।

कार्यक्रममा नाडाका अध्यक्ष करण चौधरीले अटोमोबाइल क्षेत्रलाई हेर्ने सरकारी दृष्टिकोणमा परिवर्तन आउनुपर्ने बताए। उनले अटोमोबाइल क्षेत्रको दीर्घकालीन विकास र लगानी सुरक्षित गर्न सरकारले पटक पटक परिवर्तन नहुने ‘स्थिर नीति’ ल्याउनुपर्ने माग गरे। भन्सार विभाग तथा चेम्बर अफ कमर्सका प्रतिनिधिहरूले अटोमोबाइल क्षेत्रले देशको कुल राजश्वमा करिब २५ प्रतिशत योगदान गरिरहेको तथ्यांक प्रस्तुत गर्दै यसलाई समग्र आर्थिक विकासको इन्जिनका रूपमा स्वीकार गर्नुपर्ने बताए।

एक्स्पोको पहिलो दिन अटोमोबाइलसँग सम्बन्धित विभिन्न ४८ नयाँ मोडलका सवारीसाधन सार्वजनिक गरिएको छ। मेलामा विशेषगरी विद्युतीय गाडी (EV), ई–स्कुटर, नयाँ प्रविधिका सवारीसाधन र अटो कम्पोनेन्ट्सका स्टलहरूमा दर्शकको उल्लेख्य भीड लागेको छ।

मेलाअन्तर्गत पहिलो दिन ‘आर्थिक वृद्धिका लागि प्रत्यक्ष वैदेशिक लगानी (FDI)’ विषयक प्यानल छलफलसमेत सम्पन्न भएको छ, जसमा अर्थतन्त्र र लगानीबारे मन्थन गरिएको थियो। अवलोकनकर्ताको सुविधाका लागि मेलामै बैंक तथा वित्तीय संस्था र बिमा कम्पनीहरूले विशेष अफरसहितको फाइनान्सिङ सुविधा उपलब्ध गराएका छन्। साथै, सडक दुर्घटनापछिको प्राथमिक उपचार (Basic Life Support) सम्बन्धी जनचेतनामूलक कार्यक्रम पनि सञ्चालन गरिएको आयोजकले जनाएको छ।