काठमाडौं,  प्रतिनिधिसभा निर्वाचन अन्तर्गत समानुपातिकतर्फको मतगणना सकिएको छ। निर्वाचन आयोगका सूचना अधिकारी सुमन घिमिरे ले समानुपातिक प्रणालीतर्फको सम्पूर्ण मतगणना सम्पन्न भएको जानकारी दिएका छन्।

उनका अनुसार अब दलहरूले प्राप्त गरेको सदर मतका आधारमा सिट बाँडफाँड गर्ने प्रक्रिया अघि बढाइनेछ।

“दलहरूले पाएको मतका आधारमा सिट निर्धारण गरिन्छ। त्यसपछि सम्बन्धित दललाई तीन दिनभित्र समानुपातिक बन्दसूचीमा रहेका उम्मेदवारमध्येबाट नाम सिफारिस गर्न आयोगले पत्र पठाउँछ,” घिमिरेले भने।

दलहरूले सिफारिस गरेका नामहरू आयोगले कानुनी व्यवस्था अनुसार पुनः परीक्षण गर्नेछ। सबै प्रक्रिया पूरा भएपछि आयोगले समानुपातिक प्रणालीबाट निर्वाचित हुने ११० जना सांसदलाई निर्वाचित भएको प्रमाणपत्र प्रदान गर्नेछ।

नेपालको प्रतिनिधिसभामा समानुपातिक प्रणालीअन्तर्गत कुल ११० सिट रहेका छन्। यी सिट दलहरूले प्राप्त गरेको कुल सदर मतको अनुपातका आधारमा वितरण गरिन्छ।

निर्वाचन आयोगले अब छिट्टै दलहरूलाई सिट बाँडफाँडको अन्तिम परिणाम सार्वजनिक गर्ने तयारी गरिरहेको जनाएको छ।