काठमाडौं,  नाडा अटोमोबाइल्स एसोसिएसन अफ नेपालको हालै सम्पन्न निर्वाचनसम्बन्धी रिट निवेदन पाटन उच्च अदालतले खारेज गरेको छ।

अदालतको निर्णयसँगै नव–निर्वाचित कार्यसमितिको शपथग्रहणको मार्ग प्रशस्त भएको नाडाले जनाएको छ। पहिले, अदालतमा मुद्दा विचाराधीन रहेकाले शपथग्रहण कार्यक्रम अस्थायी रूपमा स्थगित गरिएको थियो।

नाडाले अदालतको निर्णयप्रति सम्मान व्यक्त गर्दै, यसले संस्थालाई थप स्थिरता र स्पष्टता दिने विश्वास व्यक्त गरेको छ। संस्था छिट्टै विधान र प्रक्रियाअनुसार शपथग्रहण कार्यक्रम सम्पन्न गर्ने तयारीमा छ।

संस्थाले अटोमोबाइल क्षेत्रको दिगो विकास, नीतिगत संवाद र उद्योगमैत्री वातावरण सुदृढ गर्न सदस्य तथा सरोकारवालासँग सहकार्य निरन्तर गर्ने प्रतिबद्धता व्यक्त गरेको छ।

नाडा नेपालका अटोमोबाइल उद्योगको प्रतिनिधित्व गर्ने प्रमुख छाता संस्था हो र करिब पाँच दशकदेखि उद्योग प्रवर्द्धन र समन्वयको भूमिका निर्वाह गर्दै आएको छ।