काठमाडौँ , गरिमा विकास बैंक लिमिटेड र नेपाल चार्टर्ड एकाउन्टेन्ट्स संघ (एक्यान) बीच चार्टर्ड एकाउन्टेन्टहरूलाई लक्षित गर्दै विशेष सहुलियतपूर्ण कर्जा उपलब्ध गराउने सम्झौता भएको छ।

सम्झौताअनुसार, संघका सदस्यहरूले न्यूनतम कागजी प्रक्रियामै ७५ हजारदेखि ५ लाख रुपैयाँसम्मको क्रेडिट कार्ड सुविधा पाउनेछन्। साथै, आवश्यक प्रक्रिया पूरा गरेपछि बिना धितो १५ लाख रुपैयाँसम्मको व्यक्तिगत कर्जा समेत उपभोग गर्न सक्ने व्यवस्था गरिएको छ।

बैंकले सदस्यहरूको आवश्यकतालाई ध्यानमा राख्दै घर कर्जा र सवारी साधन कर्जामा समेत आकर्षक ब्याजदरको प्रस्ताव गरेको छ। हाल बैंकले ६.४९ प्रतिशतदेखि आवास कर्जा र ५.९९ प्रतिशतदेखि व्यावसायिक (एसएमई) कर्जा उपलब्ध गराइरहेको छ।

सम्झौता पत्रमा बैंकका प्रमुख कार्यकारी अधिकृत माधव प्रसाद उपाध्याय र नेपाल चार्टर्ड एकाउन्टेन्ट्स संघका अध्यक्ष अनुप नेपालले हस्ताक्षर गरेका छन्।

यो सहकार्यले चार्टर्ड एकाउन्टेन्ट्सलाई बैंकिङ्ग सेवामा विशेष छुट र प्राथमिकता पाउने अवसर सुनिश्चित गरेको छ।