काठमाडौँ – प्रहरीले उच्च हिमाली क्षेत्रमा चार्टर फ्लाइटको रेस्क्यु देखाएर बीमाको रकम ठगी गर्ने फेक रेस्क्यु प्रकरणमा ६ जनालाई पक्राउ गरेको छ। अनुसन्धान अनुसार, तीन कम्पनीमार्फत ३१७ पर्यटकको नक्कली उद्धार गरिएको र बीमाबाट करिब १९.६९ मिलियन अमेरिकी डलर ठगी भएको पाइएको छ।

पक्राउ परेकाहरूमा माउन्टेन रेस्क्यु सर्भिस प्रालिका सञ्चालक जयराम रिमाल, म्यानेजर विवेक पाण्डे, नेपाल चार्टर सर्भिसका सञ्चालक रविन्द्र अधिकारी, अपरेसन म्यानेजर विवकेराज थपलिया, एभरेस्ट एक्सपेरियन्स एन्ड असिस्टेन्स प्रालिका सञ्चालक मुक्ति पाण्डे र म्यानेजर सुभाष केसी रहेका छन्।

सीआईबीका अनुसार, पर्यटकहरूको स्वास्थ्य अवस्था सामान्य भए पनि, पर्यटन गाइडले झूठो संकट देखाएर हेलिकप्टरमार्फत उद्धार गराउने र बीमा रकम दाबी गर्ने गरेको पाइएको छ। यस प्रकरणले नेपालको अन्तर्राष्ट्रिय छवि र पर्यटन सुरक्षा प्रणालीमा प्रभाव पार्न सक्ने चेतावनी पनि दिइएको छ।

तीन कम्पनीले नक्कली उद्धार मार्फत मात्र माउन्टेन रेस्क्यु सर्भिसबाट १७१, नेपाल चार्टर सर्भिसबाट ७५, र एभरेस्ट एक्सपेरियन्स एन्ड असिस्टेन्सबाट ७१ पर्यटकको उद्धार नक्कली देखाएको पाइएको छ। यसबाट बीमा रकम कुल १९.६९ मिलियन अमेरिकी डलर हरण भएको छ।

पक्राउ परेकाहरूविरुद्ध मुलुकी अपराध संहिताको दफा ५१, २४९, २५३ र २७६ अनुसार अनुसन्धान अघि बढाइएको छ। यस प्रकरणले फेक रेस्क्यु प्रणाली, पर्यटक सुरक्षा र बीमा प्रक्रिया सुधार आवश्यक भएको देखाएको छ।

सीआईबीले प्रारम्भिक अनुसन्धान सार्वजनिक गर्दै भनेको छ, “फेक रेस्क्युको अनुसन्धान जारी छ र थप संलग्न व्यक्तिहरू पत्ता लाग्न सक्ने सम्भावना छ।