काठमाडौंबाट – नेपाल शैक्षिक परामर्श संघ, इक्यानको उपाध्यक्ष पदमा गीता शिवाकोटीले पुनः जित हासिल गरेकी छन्।
पुस २८ गते काठमाडौंमा सम्पन्न इक्यानको २८औँ साधारणसभा तथा २०औँ अधिवेशनअन्तर्गत भएको निर्वाचनमा शिवाकोटीले २९२ मत प्राप्त गर्दै उपाध्यक्ष पदमा निर्वाचित हुन सफल भएकी हुन्।

२२ वर्षदेखि शैक्षिक परामर्श क्षेत्रमा सक्रिय रहँदै आएकी शिवाकोटीले आफ्नो चुनावी अभियानमा संस्थागत निरन्तरता, महिला नेतृत्व, पेशागत मर्यादा, विकृति अन्त्य, शाखा सशक्तीकरण र राज्यसँग दरिलो संवादलाई प्रमुख एजेन्डा बनाएकी थिइन्।

निर्वाचनपछि प्रतिक्रिया दिँदै शिवाकोटीले आफूलाई विश्वास गरेर मत दिने सम्पूर्ण सदस्यहरूप्रति आभार व्यक्त गर्दै, इक्यानलाई अझ सुदृढ, समावेशी र विश्वसनीय संस्था बनाउने प्रतिबद्धता व्यक्त गरेकी छन्। उनले सदस्यहरूको विश्वासलाई जिम्मेवारीका रूपमा लिँदै, संघ र पेशाको हितमा निरन्तर काम गर्ने बताइन्।”