काठमाडौं – भारतको प्रतिष्ठित औद्योगिक समूह रिलायन्स इन्डस्ट्रीज लिमिटेड (RIL) र नेपालको अग्रणी व्यापारिक संस्था चौधरी ग्रुप (CG) बीचको सहकार्यमा लोकप्रिय भारतीय कोल्ड ड्रिंक ब्रान्ड ‘क्याम्पा कोला’ अब नेपाली बजारमा पनि उपलब्ध हुने भएको छ।

क्याम्पा कोला रिलायन्सको एफएमसीजी शाखा रिलायन्स कन्ज्युमर प्रोडक्ट्स लिमिटेड (RCPL) द्वारा उत्पादन गरिनेछ। RCPL ले नेपालमा चौधरी ग्रुपसँग मिलेर यस ब्रान्डको उत्पादन तथा वितरण सुरु गर्न लागेको हो। RCPL का कार्यकारी निर्देशक केतन मोदीले क्याम्पा कोला ५० वर्षभन्दा पुरानो ऐतिहासिक भारतीय ब्रान्ड भएको उल्लेख गर्दै नेपालमा दीर्घकालीन लगानी गर्ने प्रतिबद्धता व्यक्त गरे। “चौधरी ग्रुप जस्तो प्रतिष्ठित साझेदारसँग सहकार्य गर्न पाउनु हामी लागि गर्वको कुरा हो,” मोदीले भने, “क्याम्पा कोलाले नेपाली युवाको अडिग आत्मबल र लक्ष्यप्रतिको प्रतिबद्धता झल्काउनेछ।”

क्याम्पा कोला भारतमा पुनःव्यवसायिक उत्पादन सन् २०२३ मा सुरु गरिएको हो। यस ब्रान्डले भारतीय प्रिमियर लिग (IPL) जस्ता ठूला इभेन्टहरूको प्रायोजन गर्दै आफ्नो बजार सुदृढ गर्दै आएको छ।

अब नेपालमा चौधरी ग्रुपले क्याम्पा कोलाको उत्पादन र वितरण जिम्मेवारी सम्हाल्नेछ। समूहका प्रबन्ध निर्देशक निर्वाण चौधरीले यो साझेदारी नेपाल र नेपाली उपभोक्ताका लागि गौरवको विषय भएको बताए। “हामी हाम्रो वितरण सञ्जाल र बजार अनुभवको प्रयोग गरेर क्याम्पा कोलालाई नेपाली बजारमा लोकप्रिय बनाउनेछौं,” उनले भने।

शुरुआती चरणमा क्याम्पा कोला, क्याम्पा लेमन, क्याम्पा अरेन्ज, क्याम्प इनर्जी गोल्ड बुस्टर र क्याम्प इनर्जी बेरी किक बजारमा उपलब्ध हुने कम्पनीले जनाएको छ। २५० मिलिलिटरको क्याम्पा कोला, लेमन र अरेन्जको उपभोक्ता मूल्य रु ३० र इनर्जी बेरी किकको मूल्य रु ४० तोकिएको छ।

रिफ्रेशिङ स्वाद, आकर्षक प्याकेजिङ र जोशिलो प्रस्तुति सहित नेपाली बजारमा नयाँ तरंग ल्याउने अपेक्षा कम्पनीले लिएको छ।