काठमाडौं । नेपाल शैक्षिक परामर्श संघ (ECAN) ले पछिल्ला दिनमा सामाजिक सञ्जाल र डिजिटल माध्यमहरूमा देखिएका भ्रामक तथा अतिरञ्जित शैक्षिक विज्ञापनप्रति गम्भीर आपत्ति जनाउँदै कडा चेतावनी जारी गरेको छ।

संघले सार्वजनिक सूचना जारी गर्दै “Visa, I-20, Admission, Job वा Scholarship को ग्यारेन्टी” दिने दाबी, “Easy PR”, “No financial need” जस्ता भ्रामक शब्द प्रयोग तथा “निशुल्क सेवा” भन्दै शुल्क असुली गर्ने जस्ता कार्यहरू गैरकानुनी, अनैतिक र आचारसंहिता विपरीत रहेको स्पष्ट पारेको छ।

वि.सं. २०६३ मा पारित आचारसंहिताअनुसार सबै सदस्य संस्थाहरूले विज्ञापन मापदण्डको पालना गर्नु अनिवार्य रहेको संघले स्मरण गराउँदै यस्ता गतिविधिले सम्पूर्ण शैक्षिक परामर्श क्षेत्रको विश्वासनीयता गुम्न सक्ने चेतावनी दिएको छ।

ECAN ले यस्ता गतिविधि नियन्त्रणका लागि निगरानी र अनुशासन प्रक्रियालाई थप सशक्त बनाउने तयारी गरेको जनाएको छ। संघले आचारसंहिता उल्लंघन गर्ने संस्थाहरूमाथि आवश्यक कारबाही प्रक्रिया सुरु गरिने स्पष्ट पारेको छ।