काठमाडौं — नेपाल उद्योग परिसंघ (CNI) को नयाँ कार्यसमिति चयन भएको छ। परिसंघको २२औं वार्षिक साधारण सभाले वीरेन्द्रराज पाण्डेलाई अध्यक्षमा चयन गरेको हो। यसअघि वरिष्ठ उपाध्यक्ष रहेका पाण्डे परिसंघको विधानअनुसार स्वतः अध्यक्ष बनेका हुन्।

नयाँ कार्यसमितिका लागि निर्वाचित राष्ट्रिय परिषद सदस्यहरूको सर्वसम्मत निर्णयबाट सात जना उपाध्यक्ष चयन भएका छन्। परिसंघको वरिष्ठ उपाध्यक्षमा निर्वाण चौधरी चयन भएका छन्। उनी चौधरी ग्रुपका कार्यकारी निर्देशक समेत हुन्। परिसंघको विधानअनुसार आगामी अधिवेशनमा चौधरी स्वतः अध्यक्ष बन्नेछन्।

अन्य उपाध्यक्षहरूमा राजबहादुर शाह, हेमराज ढकाल, रोहित गुप्ता, अमित मोर, भीम घिमिरे र गोकुल भण्डारी निर्वाचित भएका छन्।

त्यसैगरी, परिसंघको स्थायी आमन्त्रित सदस्यका रूपमा सन्दिप शारडा, विदूषी राणा र प्राची अग्रवाल मनोनयन भएका छन्।

नवनिर्वाचित अध्यक्ष पाण्डेले उपाध्यक्षहरू तथा राष्ट्रिय परिषद सदस्यहरूलाई सपथ ग्रहण गराएका थिए।