काठमाडौं, टक्सार पिखुवा खोला हाइड्रोपावर कम्पनीले पहिलो चरणको प्राथमिक सेयर (आईपीओ) निष्कासन गरेको छ। कम्पनीले आयोजना प्रभावित स्थानीयवासी र वैदेशिक रोजगारीमा रहेका नेपालीका लागि बुधबारदेखि आईपीओ खुला गरेको हो।

कम्पनीले जारी पूँजी १ अर्ब २० करोड रुपैयाँको ३५.२६ प्रतिशत बराबर ४२ लाख ३० हजार ६६८ कित्ता साधारण सेयर निष्कासन गर्न अनुमति पाएको छ। आईपीओको निष्कासन तथा बिक्री प्रबन्धक प्रभु क्यापिटल रहेको छ।

निष्कासन गरिएको सेयरमध्ये १२ लाख कित्ता आयोजना प्रभावित स्थानीयका लागि छुट्याइएको छ। उक्त सेयरका लागि भोजपुर जिल्लाका स्थानीय बासिन्दाले आवेदन दिन सक्नेछन्। त्यस्तै ३ लाख ३ हजार ६७ कित्ता सेयर वैदेशिक रोजगारीमा रहेका नेपालीका लागि छुट्याइएको कम्पनीले जनाएको छ।

लगानीकर्ताले न्यूनतम १० कित्ता र अधिकतम ५० हजार कित्तासम्म आवेदन दिन सक्नेछन्। आयोजना प्रभावित स्थानीयले छिटोमा चैत ११ गतेदेखि ढिलोमा चैत २६ गतेसम्म आवेदन दिन सक्नेछन् भने वैदेशिक रोजगारीमा रहेका नेपालीले चैत १ देखि चैत ११ गतेसम्म आवेदन दिन सक्नेछन्।

प्रभावित स्थानीयले आयोजना कार्यालय भोजपुर, प्रभु बैंकका भोजपुर, प्याउली र हटुवागढी शाखा तथा सिटिजन्स बैंक भोजपुर शाखाबाट आवेदन दिन सक्नेछन्। वैदेशिक रोजगारीमा रहेका नेपालीले भने मेरोसेयर प्रणालीमार्फत अनलाइन आवेदन दिन सक्नेछन्।

कम्पनीले केयर रेटिङ नेपालबाट ‘बीबी’ रेटिङ प्राप्त गरेको जनाएको छ।

टक्सार पिखुवा खोला हाइड्रोपावर कम्पनीले भोजपुरमा ८ मेगावाट क्षमताको जलविद्युत आयोजना सञ्चालन गरिरहेको छ। आयोजनाको प्रतिमेगावाट लागत करिब २३ करोड ५३ लाख रुपैयाँ रहेको छ। कम्पनीका अनुसार आयोजनाको साधारण लगानी फिर्ता अवधि ९.१७ वर्ष तथा डिस्काउन्ट आधारमा १८.३७ वर्ष रहेको छ।