काठमाडौं । बहुप्रतिक्षित नेपाली चलचित्र ‘माग्ने राजा’ को टिकट बुकिङ आधिकारिक रूपमा सुरु भएको छ । सामाजिक सञ्जालमै ‘हट केक’ बनेको यो चलचित्र अब दर्शकले खल्ती एपमार्फत अनलाइनमै सजिलै टिकट बुक गर्न सक्नेछन् ।

भदौ ६ गतेबाट देशभर रिलिज हुने फिल्ममा माग्ने बुढा (केदारप्रसाद घिमिरे)लाई पहिलो पटक लिड रोलमा देख्न पाइने भएको छ । उनीसँगै वर्षा सिवाकोटी, विल्सन विक्रम राई, शिशिर वाङ्देल लगायतका कलाकारको अभिनय रहेको छ ।

फिल्मलाई ऋषि लामिछानेले निर्देशन गरेका हुन् भने मुनाल घिमिरे निर्माता हुन् । पटकथा सामिप्यराज तिमिल्सिनाले लेखेका छन् ।

पहिल्यै सार्वजनिक भएका फस्टलुक, टिजर र गीतले दर्शकको उत्सुकता बढाइसकेका छन् । ‘सुतेर उठेको पैसामा’ बोलको गीतले युट्युबमा मात्रै ३९ लाखभन्दा बढी भ्यु पाइसकेको छ भने टिजरलाई १३ लाखभन्दा बढीले हेरेका छन् ।

टिकट बुकिङ सुरु भएसँगै दर्शकमाझ चलचित्रप्रतिको चर्चा झन् चुलिएको छ । अब प्रतीक्षा भनेको केवल भदौ ६ गते पर्दा उघ्रने क्षणसम्मको मात्र हो ।