काठमाडौं – नेपाली फिल्म ‘कोशेढुङ्गा’ बाट तीज लक्षित गीत ‘नत्र भने जिन्दगी’ सार्वजनिक भएको छ। समसामयिक सन्देश र सांगीतिक कौशल मिसिएको गीतले सार्वजनिक भएको केही घण्टामै दर्शकको सकारात्मक प्रतिक्रिया पाएको छ।

7 Seas International को युट्युब च्यानलमार्फत सार्वजनिक गीतमा गायिका समीक्षा अधिकारी, गायक खेम सेन्चुरी र दिपिका बायम्बु मगरको स्वर समेटिएको छ। गीतमा शब्द नेत्र अर्यालको रहेको छ भने संगीत संयोजन र हुकलाइन सिर्जना खेम सेन्चुरीले गरेका छन्। एरेञ्ज, मिक्सिङ तथा मास्टरिङ श्यामश्वेत रसाइलीले गरेका हुन्।

गीतको भिडियोमा सुरक्षा पन्त, निती शाह, ऋचा शर्मा, मनजिल कुमार, स्नेहा जोशीलगायत कलाकारको अभिनय तथा तीजको रौनक झल्कने नृत्य प्रस्तुत गरिएको छ। परम्परागत भाव र आधुनिक संगीतको संयोजनले गीतलाई छुट्टै पहिचान दिएको छ।

‘कोशीढुङ्गा’ चलचित्रका निर्देशक सरोज पौडेल हुन्। महिला–केन्द्रित कथामा आधारित फिल्म आगामी भदौ १२ गते नेपालसहित ४० भन्दा बढी देशमा एकसाथ प्रदर्शन हुने तयारीमा छ। फिल्ममा सुरक्षा पन्त, आर्यन सिग्देल, निती शाह, ऋचा शर्मा, सरोज खनाल, मनजिल कुमार लगायतका कलाकारको अभिनय रहनेछ।

चलचित्रको प्रचारप्रसारका क्रममा सार्वजनिक गरिएको यो गीतले तीजको सांगीतिक माहोलमा नयाँ स्वाद थपेको छ। दर्शकहरूले गीतलाई रमाइलो, जीवन्त र सन्देशमूलक भन्दै प्रशंसा गरिरहेका छन्।

  भिडियाे