नेपालको सार्वजनिक ऋण उकालो लागेर पौने २७ खर्ब नजिक पुगेको छ । सार्वजनिक ऋण व्यवस्थापन कार्यालयको तथ्यांक अनुसार फागुन मसान्तसम्ममा सार्वजनिक ऋण २६ खर्ब ७६ अर्ब रुपैयाँ पुगेको हो ।

चालु आर्थिक वर्षको पहिलो चरणमा २४ खर्ब ३४ अर्ब रुपैयाँ रहेको ऋण ८ महिनामा मात्रै २ खर्ब ४२ अर्ब रुपैयाँले बढेको हो । यो ऋण नेपालको कुल गार्हस्थ्य उत्पादनको ४६.९१ प्रतिशत बराबर पुगेको हो ।

सो मध्ये आन्तरिक ऋण दायित्वतर्फ १३ खर्ब १५ अर्ब रुपैयाँ तथा बाह्य ऋण दायित्वतर्फ १३ खर्ब ६० अर्ब रुपैयाँ रहेको कार्यालयले उल्लेख गरेको छ । आन्तरिक र बाह्य ऋणको कूल हिस्सा क्रमशः ५०.८३ प्रतिशत र ४९.१६ प्रतिशत रहेको छ ।

तथ्यांकअनुसार चालु आर्थिक वर्षको फागुन मसान्तसम्म सरकारले २ खर्ब ६९ अर्ब १५ करोड रुपैयाँ आन्तरिक ऋण उठाउँदा बाह्य क्षेत्रबाट ६५ अर्ब ४७ करोड रुपैयाँ प्राप्त गरेको छ ।

सोही अवधिमा १ खर्ब ३४ अर्ब ४७ करोड बराबर आन्तरिक र बाह्यतर्फ २४ अर्ब ५० करोड रुपैयाँ बराबरको ऋणको सावाँ तिरेको कार्यालयले जनाएको छ । त्यस्तै, ३६ अर्ब ९७ करोड रुपैयाँ बराबरको आन्तरिक ऋणको ब्याज भुक्तानी तथा ५ अर्ब ७७ करोड रुपैयाँ बराबरको बाह्य ऋणको ब्याज भुक्तानी सरकारले गरेको छ ।

देशलाई विदेशी विनिमयदरमा भएको ह्रासका कारण मात्रै ६६ अर्ब २९ करोड रुपैयाँ बराबरको ऋण वृद्धि भएको कार्यालयको तथ्यांकले पुष्टि गेरेको छ । सरकारले यो वर्ष ३ खर्ब ३० अर्ब रुपैयाँ बराबरको आन्तरिक ऋण तथा २ खर्ब १७ अर्ब रुपैयाँ बराबरको बाह्य ऋण उठाउने लक्ष्य लिएको छ ।

यो ऋण रकम देशको जनसंख्यालाई भाग लगाउने हो भने प्रतिव्यक्ति ९० हजार ३२० रुपैयाँ बराबर हो ।