काठमाडौँ। जननायक बीपी कोइरालाको ४४औं स्मृति दिवसको अवसर पारेर नेपाली कांग्रेसको केन्द्रीय नीति, अनुसन्धान तथा प्रशिक्षण प्रतिष्ठानले जलवायु परिवर्तनसम्बन्धी जनचेतना जगाउने उद्देश्यसहित राजधानीमा ‘ग्रिन रन’ (हरित दौड) आयोजना गरेको छ।

नेताहरूको उत्साहजनक सहभागिता र प्रतिबद्धता

‘जलवायु जनचेतना जगाउन जुटौं’ भन्ने मूल नाराका साथ आयोजना गरिएको ५ किलोमिटर लामो दौडमा कांग्रेस सभापति गगन थापा, उपसभापति विश्वप्रकाश शर्मा, महामन्त्री प्रदीप पौडेललगायतका शीर्ष नेताहरूको उल्लेख्य सहभागिता रहेको थियो।

कार्यक्रमलाई सम्बोधन गर्दै सभापति थापाले जलवायु परिवर्तनलाई नेपालको विकासको प्रमुख एजेन्डा बनाइने बताए। यसका लागि पार्टीले विज्ञहरूसँग छलफल सुरु गरिसकेको र प्राप्त सुझावलाई नीति निर्माणको तहमा समेटिने उनको भनाइ थियो।

यसैगरी, उपसभापति शर्माले हजारौं युवाको सहभागिताले जलवायु परिवर्तनको मुद्दामा सकारात्मक सन्देश प्रवाह गरेको बताए भने महामन्त्री पौडेलले जलवायु परिवर्तन अब सबैको साझा एजेन्डा हुनुपर्ने कुरामा जोड दिए।

प्रधानमन्त्रीमाथि सभापतिको व्यङ्ग्य

सम्बोधनका क्रममा सभापति थापाले वर्तमान राजनीतिक नेतृत्वलाई संयम र दूरदृष्टिको आवश्यकता रहेको औंल्याए। प्रधानमन्त्री बालेन साहले रास्वपाको प्रथम महाधिवेशनमा दिएको अभिव्यक्तिप्रति लक्षित गर्दै उनले “गाडीमा ब्रेक नहुनेले सरकार चलाउने” भन्दै व्यङ्ग्यात्मक प्रहार गरे।

विज्ञहरूसँग छलफल र लाइभ पेन्टिङ

युएन पार्कबाट सुरु भएको उक्त दौड जावलाखेल पुगेर समापन भएको थियो। समापनअघि जावलाखेलस्थित फाल्चामा ‘जलवायु परिवर्तनको चुनौतीः निराकरण कसरी’ विषयक विज्ञसहितको प्यानल छलफल सञ्चालन गरिएको थियो। छलफल चलिरहँदा सोही स्थलमा ख्यातिप्राप्त चित्रकारहरूले जलवायु परिवर्तनका चुनौती र सम्भावनालाई झल्काउने आकर्षक ‘लाइभ पेन्टिङ’ समेत गरेका थिए।

‘मानव सहायता कल्याण कोष’ को घोषणा

कार्यक्रमको समापन गर्दै सभापति थापाले पार्टी सदस्यहरूबाट संकलित सदस्यता शुल्कको केही हिस्सा प्रयोग गरेर ‘मानव सहायता कल्याण कोष’ स्थापना गरिएको महत्त्वपूर्ण घोषणा गरे।

कोषमा सुरुआतमै १० लाख रुपैयाँ जम्मा भइसकेको जानकारी दिँदै उनले भने, “उक्त रकम हालै विस्थापित सुकुम्वासी परिवार, विशेषगरी एकल महिला र शिक्षाबाट वञ्चित बालबालिकाको सहयोगार्थ खर्च गरिनेछ।”

कार्यक्रम सफल बनाउन तरुण दलको महत्त्वपूर्ण भूमिका

यस ‘ग्रिन रन’ कार्यक्रमलाई भव्य र व्यवस्थित रूपमा सम्पन्न गर्न नेपाली कांग्रेसको भ्रातृ संस्था नेपाल तरुण दलले अत्यन्तै महत्त्वपूर्ण भूमिका निर्वाह गरेको थियो। तरुण दलका सदस्यहरूले कार्यक्रमको समग्र व्यवस्थापनदेखि सञ्चालनसम्मको आफ्नो जिम्मेवारी पूर्ण कुशलता र इमान्दारीका साथ निभाएका थिए।

दौडमा सहभागीहरूलाई प्रोत्साहनस्वरूप धुपी र सल्लालगायतका बिरुवा वितरण गरिएको थियो। बीपी कोइरालाले तत्कालीन समयमै प्रकृति र पर्यावरण संरक्षणमा पुर्‍याएको विशिष्ट योगदानको स्मरण गर्दै, वर्तमान जलवायु संकटको अवस्थामा सम्पूर्ण नागरिक एकजुट भएर लाग्नुपर्ने सन्देश प्रवाह गर्न यो कार्यक्रम आयोजना गरिएको नेपाली कांग्रेसले जनाएको छ।