काठमाडौँ। नेपाली अटोमोबाइल क्षेत्रको सबैभन्दा ठूलो र प्रतिष्ठित कुम्भमेला ‘नाडा अटो शो २०२६’ को १८औँ संस्करण आगामी भदौमा आयोजना हुने भएको छ। नाडा अटोमोवाइल्स एशोसिएशन अफ नेपाल (नाडा) ले आगामी भदौ ९ देखि १४ गतेसम्म राजधानीमा आयोजना हुने यस भव्य प्रदर्शनीका लागि जेठ १८ गतेदेखि नै स्टल बुकिङ खुल्ला गरिसकेको छ। मेलामा सहभागी हुन चाहने व्यवसायी तथा संस्थाहरूले आगामी जेठ २६ गतेभित्र स्टल बुक गरिसक्नुपर्ने नाडाले जनाएको छ।

६ दिनसम्म चल्ने यस भव्य मेलामा नेपालका अटोमोबाइल उत्पादक, आयातकर्ता, वितरक, सेवा प्रदायक तथा सम्बन्धित उद्योगहरूले आफ्ना नवीनतम उत्पादन, अत्याधुनिक प्रविधि र सेवाहरू प्रदर्शन गर्नेछन्। मेलामा दुई पाङ्ग्रे, चार पाङ्ग्रे र कमर्सियल सवारी साधनका साथै पार्ट-पुर्जा, टायर, लुब्रिकेन्ट्स, ब्याट्री तथा एसेसरिजहरूको व्यापक उपस्थिति रहनेछ। यसका साथै, ग्राहकलाई तत्कालै अटो लोन र बीमा सुविधा उपलब्ध गराउन विभिन्न बैंक तथा वित्तीय संस्थाहरूको समेत मेलामा विशेष सहभागिता रहनेछ।

पछिल्ला वर्षहरूमा नेपाली बजारमा विद्युतीय सवारी साधन (इभी) तर्फको आकर्षण र माग तीव्र रूपमा बढिरहेकाले यस वर्षको अटो शोमा पनि नयाँ इभी मोडल र पर्यावरणमैत्री प्रविधि मुख्य आकर्षण बन्ने अनुमान गरिएको छ। सुस्ताएको सवारी साधन व्यवसायलाई नयाँ बजेट र नयाँ आर्थिक वर्षको सुरुवातसँगै चलायमान बनाउन यो मेलाले महत्त्वपूर्ण भूमिका खेल्ने विश्वास व्यवसायीहरूको छ।

हजारौँको संख्यामा आम उपभोक्ता, उद्योगी, लगानीकर्ता र सञ्चारकर्मीहरूले अवलोकन गर्ने अपेक्षा गरिएको यस मेलाको स्टल बुकिङ सम्बन्धी विस्तृत जानकारी, आवेदन प्रक्रिया र शुल्क विवरण नाडाको व्यवस्थापक कम्पनीमार्फत प्राप्त गर्न सकिने आयोजकले जनाएको छ।