कञ्चनपुर – कञ्चनपुर जिल्लाको बेलडाँडी गाउँपालिकाले छोरी जन्माउने आमालाई प्रोत्साहनस्वरूप जनही रु ३,००० नगद भत्ता उपलब्ध गराउने कार्यक्रम कार्यान्वयनमा ल्याएको छ। लैङ्गिक समानता प्रवर्द्धन गर्ने तथा छोरीप्रतिको सकारात्मक सामाजिक धारणा विकास गर्ने उद्देश्यले योजना सञ्चालन गरिएको गाउँपालिकाले जनाएको छ।

गाउँपालिका उपप्रमुख शान्ती नाथका अनुसार छोरी जन्मलाई सम्मान र प्रोत्साहनसँग जोड्ने उद्देश्यले कार्यक्रम सुरु गरिएको हो। समाजमा अझै पनि छोरा प्राथमिकताको सोच विद्यमान रहेकाले त्यसलाई परिवर्तन गर्दै छोरी जन्मप्रति सकारात्मक सन्देश प्रवाह गर्न कार्यक्रम प्रभावकारी हुने अपेक्षा गरिएको उनले बताइन्।

गाउँपालिकाले जनाएको अनुसार छोरी जन्माउने आमाले उक्त भत्ता प्राप्त गर्न विवाह दर्ता प्रमाणपत्र र नवजात शिशुको जन्म दर्ता प्रमाणपत्र पेश गर्नुपर्नेछ। यस व्यवस्थाले कानुनी दर्ता प्रणालीलाई समेत प्रोत्साहन मिल्ने विश्वास गरिएको छ।

स्थानीय तहले यसअघि पनि मातृ तथा शिशु स्वास्थ्य, आपतकालीन स्वास्थ्य सेवा र सामाजिक सुरक्षासम्बन्धी विभिन्न कार्यक्रम सञ्चालन गर्दै आएको जनाएको छ। जनप्रतिनिधिहरूले प्रस्तुत कार्यक्रमले दीर्घकालीन रूपमा लैङ्गिक विभेद न्यूनीकरण तथा सामाजिक चेतना अभिवृद्धिमा योगदान पुर्‍याउने विश्वास व्यक्त गरेका छन्।