काठमाडौं । नेपाल प्रिमियर लिग (एनपीएल) को सर्वाधिक लोकप्रिय टिम सुदूरपश्चिम रोयल्सले अण्डर–१६ राष्ट्रिय क्रिकेट टोलीका खेलाडी सुशील रावललाई अभ्यासका लागि १ लाख रुपैयाँ आर्थिक सहयोग गरेको छ।

एनपीएलको पहिलो सिजनमा सुदूरपश्चिम रोयल्सले आयोजना गरेको ‘ट्यालेन्ट हन्ट’ कार्यक्रमबाट छनोट गरिएका ८ जना ‘हिरो’ खेलाडीमध्ये रावल एक हुन्। सुशील रावलले हालै सम्पन्न सिंगापुरमा आयोजित अन्तर्राष्ट्रिय ACC U-16 East Zone Cup मा नेपाली टोलीबाट खेलेका थिए। उनले नेपाललाई उपाधि जिताउने यात्रामा महत्वपूर्ण योगदान दिएका थिए।

सहयोग हस्तान्तरण कार्यक्रमका क्रममा सुदूरपश्चिम रोयल्सका प्रमुख कार्यकारी अधिकृत (CEO) प्रकाश खड्काले भने  “हामी अत्यन्तै हर्षित छौं, किनभने हाम्रो ट्यालेन्ट हन्टबाट छनोट गरिएका खेलाडीहरूले राष्ट्रिय टिमसम्म स्थान बनाउनु गर्वको कुरा हो। सुशील रावलजस्ता प्रतिबद्ध र अनुशासित खेलाडीलाई सहयोग गर्न पाउनु हामी सबैका लागि प्रेरणादायी छ।”

सिंगापुरमा सम्पन्न उक्त प्रतियोगितामा नेपालले ऐतिहासिक सफलता हात पारेको थियो।
CEO खड्काले भविष्यमा अझ धेरै नयाँ प्रतिभाहरूको खोज र प्रोत्साहनमा जोड दिँदै थपे, सुदूरपश्चिममा अझ धेरै लुकेका हिरा छन्। हामी निरन्तर नयाँ ट्यालेन्ट पहिचान र प्रोत्साहनमा लाग्नेछौं। एनपीएलको तयारी पनि भव्यताका साथ हुँदैछ। यो सिजनमा अझ राम्रो र फरक तरिकाले तयारी गरिरहेका छौं। फ्यानहरूले धैर्य राख्न अनुरोध गर्दछु।’ सुदूरपश्चिम रोयल्सको यो पहललाई क्षेत्रीय खेल विकासमा निजी क्षेत्रको उत्कृष्ट उदाहरणको रूपमा हेरिएको छ।