काठमाडौँ ।अर्थमन्त्री डा. स्वर्णिम वाग्लेले नेपाली इतिहासकै ठूलो वित्तीय अपराधमा संलग्न समूहबाट प्रधानमन्त्री र आफूमाथि नियोजित रूपमा घेराबन्दी र आक्रमण भइरहेको दाबी गर्नुभएको छ। बुधबार प्रतिनिधि सभाको अर्थ समितिमा आयोजित बजेटसम्बन्धी छलफलमा बोल्दै उहाँले यस्तो गम्भीर आरोप लगाउनुभएको हो।

सरकारले इतिहासकै ठूलो वित्तीय अपराधको छानबिन गरिरहेको र उक्त मुद्दा केही दिनमै अदालत पुग्न लागेकाले त्रसित भएको समूहले आफूहरू विरुद्ध प्रहार गरिरहेको अर्थमन्त्री वाग्लेको भनाइ छ। उहाँले भन्नुभयो,”हामीसँग रुष्ट तिनै समूहबाट पालित-पोषित तत्वहरूबाट प्रधानमन्त्रीज्यू र ममाथि आक्रमण भइरहेको मलाई शंका लागेको छ।”

उहाँले सार्वभौम संसद्का माननीय सदस्यहरूलाई समेत त्यस्ता अपराधी समूहको कुरा र हल्लाको प्रभावमा नपर्न विशेष आग्रह गर्नुभयो। संसद्को गरिमालाई कसैको लहलहैमा लागेर कमजोर पार्न नहुनेमा जोड दिँदै उहाँले सांसदहरूलाई सचेत रहन समेत ध्यानाकर्षण गराउनुभएको छ।