काठमाडौँ ।सरकारले सरकारी निकायहरूमा अनुशासन र सुशासन कायम गर्न सुरु गरेको आकस्मिक अनुगमनका क्रममा ठुलो सङ्ख्यामा कर्मचारीहरू कारबाहीमा परेका छन्।

गत चैत १३ गतेदेखि हालसम्म देशभरका ५०९ वटा सरकारी कार्यालयमा गरिएको विशेष अनुगमनका क्रममा कुल ५,५१४ जना कर्मचारी कारबाहीमा परेका हुन्।

अनुगमनका क्रममा सरकारी कर्मचारीहरूमा समय पालनाको चरम लापरबाही देखिएको छ। कारबाहीमा परेका कुल कर्मचारीमध्ये ५,०९७ जना कर्मचारी कार्यालय समय पालना नगरेका कारण कारबाहीको भागीदार बनेका हुन्। बाँकी कर्मचारीहरू तोकिएको पोसाक नलगाउने र विना सूचना कार्यकक्षमा अनुपस्थित रहने गरेका थिए।

सम्बन्धित निकायका अनुसार नियम उल्लंघन गर्ने सबै कर्मचारीहरूलाई आवश्यक विभागीय कारबाहीका लागि प्रक्रिया अगाडि बढाइएको छ र आगामी दिनमा पनि यस्तो आकस्मिक अनुगमनलाई निरन्तरता दिइनेछ।