काठमाडौँ । मुस्ताङको उत्तरी कोरला नाका हुँदै नेपाल भित्रिएका ७७४ वटा सवारी साधनहरूलाई सशस्त्र प्रहरी बलले नियन्त्रणमा लिएको छ। भन्सार प्रक्रियामा गम्भीर अनियमितता र राजस्व छलीको आशंकामा सशस्त्र प्रहरीले यी गाडीहरूलाई मुस्ताङदेखि पोखरासम्मका विभिन्न सडक खण्डहरूबाट नियन्त्रणमा लिएको हो। नियन्त्रणमा लिइएका गाडीहरूमध्ये अधिकांश चिनियाँ विद्युतीय सवारी साधन (ईभी) ब्रान्ड बीवाईडी (BYD) का रहेका छन्।

सशस्त्र प्रहरी बलका प्रवक्ता विष्णुप्रसाद भट्टका अनुसार भन्सार नाकाबाट जाँचपास भई बाहिरिसकेका गाडीहरूको कागजात र मूल्याङ्कनमा गम्भीर कैफियत रहेको विशेष र गोप्य सूचनाका आधारमा यो कदम चालिएको हो। कोरला नाकाबाट छुटेर पोखरातर्फ आउँदै गरेका गाडीहरूलाई सशस्त्रले बाटोमै रोकेर सुरक्षा नियन्त्रणमा लिएको थियो। हाल यी गाडीहरूलाई मुस्ताङको कोरला याड, जोमसोम, पर्वतको कुश्मा र पोखराको ह्याम्जामा उच्च सुरक्षाका साथ राखिएको छ।

चीनसँगको व्यापारका लागि पछिल्लो समय सञ्चालनमा आएको कोरला नाकामा अन्य स्थापित नाकाहरूको तुलनामा भौतिक पूर्वाधार र प्राविधिक जाँचबुझ प्रणाली कमजोर रहेको फाइदा उठाउँदै आयातकर्ताहरूले ठूलो संख्यामा महँगा ईभी गाडीहरू यताबाट भित्र्याएको हुनसक्ने सुरक्षा स्रोतको अनुमान छ। विशेष गरी नेपाल सरकारले बजेटमार्फत विद्युतीय गाडीको मोटर क्षमता (किलोवाट) का आधारमा भन्सार र अन्तःशुल्कको दर तय गर्ने गरेको छ। आयातकर्ताहरूले बढी क्षमता भएका बीवाईडी गाडीहरूलाई कागजातमा कम क्षमताको देखाएर करोडौँ रुपैयाँ राजस्व छली गरेको हुनसक्ने उच्च आशंका गरिएको छ।

स्थानीय भन्सार कार्यालयले क्लियरेन्स दिइसकेका गाडीहरूलाई सशस्त्र प्रहरीले बाटोमै नियन्त्रणमा लिनुले भन्सारकै कर्मचारीहरूको मिलेमतो वा जाँचबुझमा गम्भीर लापरवाही भएको सङ्केत गर्दछ। सशस्त्र प्रहरीले समातिएका यी सबै सवारी साधनहरूको विस्तृत कागजात छानबिन र कानुनी प्रक्रियाका लागि सम्बन्धित भन्सार विभाग वा राजस्व अनुसन्धान विभागमा बुझाउने तयारी गरिरहेको छ। यदि प्रारम्भिक अनुसन्धानमा देखिएबमोजिम भन्सार छली र क्षमता फेरबदलको कसुर प्रमाणित भएमा, यो नेपालको अटोमोबाइल क्षेत्रकै सबैभन्दा ठूलो राजस्व घोटालामध्ये एक हुने देखिएको छ।