काठमाडौँ । टर्किस एयरलाइन्सको विमान अवतरणका क्रममा चक्कामा आगलागी भएपछि करिब डेढ घण्टा बन्द भएको त्रिभुवन अन्तरराष्ट्रिय विमानस्थल पुनः सञ्चालनमा आएको छ । बिहान ६:४५ बजेदेखि अवरुद्ध भएको उडान तथा अवतरण ८:३० बजेपछि नियमित भएको हो ।

आज बिहान टर्कीको इस्तानबुलबाट २ सय ७३ यात्रु र ११ जना चालक दलका सदस्य लिएर आएको टिके ७२६ (TK 726) नम्बरको विमान अवतरण गर्ने क्रममा चक्कामा आगो देखिएको थियो । विमानस्थल सुरक्षा कार्यालयका प्रहरी उपरीक्षक राजकुमार सिलवालका अनुसार धावनमार्गमै विमानको चक्कामा आगो लागेपछि दमकलको सहायताले तत्काल निभाइएको थियो ।

आगलागी लगत्तै विमानलाई रनवेमै रोकेर आपतकालीन द्वारबाट सबै यात्रु र चालक दलका सदस्यहरूको सुरक्षित उद्धार गरिएको छ । विमानस्थलका निमित्त महाप्रबन्धक टेकनाथ सिटौलाले अवरोध हटेपछि बिहान ८:३० बजे एयर इन्डिया र ८:३५ बजे फ्लाई दुबईको विमान अवतरण भएसँगै विमानस्थल पूर्ण रूपमा सञ्चालनमा आएको जानकारी दिनुभयो ।

विमानस्थल बन्द हुँदा केही समय आन्तरिक तथा अन्तरराष्ट्रिय उडानहरू प्रभावित भएका थिए । अहिले विमानस्थलबाट हुने उडान र अवतरण दुवै नियमित भइसकेका छन् ।