काठमाडौं, नवनियुक्त ऊर्जामन्त्री कुलमान घिसिङले पदभार ग्रहण गर्दै सरकारी सुविधा नलिने घोषणा गरेका छन्। उनले आफूले तलबभत्ता शहीद सहयोग कोषमा दिने र सुरक्षाबाहेक अन्य सुविधा नलिने स्पष्ट पारेका छन्।

सिंहदरबारस्थित मन्त्रालयमा आयोजित कार्यक्रममा बोल्दै मन्त्री घिसिङले भ्रष्टाचारविरुद्ध शून्य सहनशीलता अपनाउने अठोट व्यक्त गरे। “भ्रष्टाचार मेरो लागि जीवनमरणको विषय हो,” उनले भने, “कुनै पनि अनियमितता देखिएमा कडाभन्दा कडा कारबाही हुनेछ।”

उनले पारदर्शितामा कुनै प्रश्न उठे सिधा आफूलाई सम्पर्क गर्न पनि अनुरोध गरे। “ठिक मान्छेलाई ठिक ठाउँमा राख्ने मेरो स्पष्ट नीति हुनेछ, यसमा कुनै सम्झौता हुँदैन,” उनले स्पष्ट पारे।

यसअघि नेपाल विद्युत् प्राधिकरणको नेतृत्वमा रहँदा लोडसेडिङ अन्त्य गरी चर्चामा आएका घिसिङलाई फेरि ऊर्जा मन्त्रालयको जिम्मेवारी दिइएको छ। उनको यो सन्देशले जनताको विश्वास जित्ने र मन्त्रालयभित्रको अनुशासन कायम गर्ने अपेक्षा गरिएको छ।