रौतहट — रौतहट प्रहरीले ठूलो परिणाममा लागू औषध गाँजासहित एक कार बरामद गरेको छ। चन्द्रनिगाहपुरबाट गौरतर्फ गइरहेको ग ३ च ६८९६ नम्बरको कारबाट १३३ किलो गाँजा फेला परेको इलाका प्रहरी कार्यालय गरुडाले जनाएको छ।
डिएसपी राजन कार्कीका अनुसार प्रहरी टोलीले मंगलवार बिहान चेकजाँचका क्रममा कारलाई रोक्न खोज्दा चालकले तीव्र गतिमा गाडी हाँक्दै भाग्न प्रयास गरेका थिए। प्रहरीले तत्कालै पछ्याउँदा गरुडा नगरपालिका–५ स्थित झाझ खोला नजिक करिब २० फिट गहिरो खेतमा उक्त कार फेला परेको हो।
कारमा सवार व्यक्ति भने उखुवारी हुँदै फरार भएको र उनीहरूको खोजी भइरहेको डिएसपी कार्कीले जानकारी दिए। क्रेनको सहायताले कार बाहिर निकालेर जाँच गर्दा उक्त परिणाममा गाँजा फेला परेको हो।
यस सम्बन्धमा थप अनुसन्धान भइरहेको प्रहरीले जनाएको छ।