काठमाडौं । यस वर्षको माध्यमिक शिक्षा परीक्षा (SEE) २०८२ को परीक्षाफल परीक्षा सम्पन्न भएको करिब एक महिनामै सार्वजनिक भएपछि शिक्षा प्रशासनको कार्यक्षमतामाथि सकारात्मक चर्चा सुरु भएको छ। लामो समयसम्म ढिलो नतिजा प्रकाशनको आलोचना खेप्दै आएको प्रणालीले यसपटक भने अपेक्षाकृत छोटो अवधिमै नतिजा सार्वजनिक गर्दै सुधारको संकेत दिएको हो।

शिक्षा, विज्ञान तथा प्रविधिमन्त्री सस्मित पोखरेलले  सामाजिक सञ्जालमार्फत प्रतिक्रिया दिँदै समयमै नतिजा प्रकाशन हुनु केवल नियमित प्रक्रिया नभई “राज्य संयन्त्रको सामूहिक प्रतिबद्धता र कार्यक्षमताको उदाहरण” भएको उल्लेख गरेका छन्। उनले परीक्षा सञ्चालनदेखि उत्तरपुस्तिका परीक्षण, नतिजा तयारी र प्रकाशनसम्म खटिएका शिक्षक–शिक्षिका, कर्मचारी, राष्ट्रिय परीक्षा बोर्ड, सुरक्षा निकाय तथा प्रत्यक्ष–अप्रत्यक्ष रूपमा योगदान पुर्‍याउने सबैप्रति आभार व्यक्त गरेका छन्।

यसपटक परीक्षा केन्द्रमै उत्तरपुस्तिका परीक्षण गर्ने व्यवस्थासहित अपनाइएका केही सुधारात्मक उपायले नतिजा प्रकाशनलाई छिटो बनाउन महत्त्वपूर्ण भूमिका खेलेको मन्त्रालयको दाबी छ। विगतमा उत्तरपुस्तिका ढुवानी, परीक्षण व्यवस्थापन र तथ्यांक संकलनका कारण महिनौँ ढिलाइ हुने गरेको अवस्थामा यस वर्षको नतिजाले प्रशासनिक समन्वय र प्रविधि प्रयोग प्रभावकारी बन्न थालेको संकेत गरेको शिक्षा क्षेत्रका जानकारहरू बताउँछन्।

मन्त्रीले सफल विद्यार्थीहरूलाई बधाई दिँदै उनीहरूको उपलब्धि मेहनत, अनुशासन, अभिभावकको साथ तथा गुरुहरूको समर्पित मार्गदर्शनको प्रतिफल भएको बताएका छन्। साथै उनले SEE लाई मात्र अन्तिम गन्तव्यका रूपमा नलिई +२, स्नातक तथा स्नातकोत्तर तहसम्म परीक्षा प्रणालीलाई थप व्यवस्थित, छिटो, विश्वसनीय र विद्यार्थीमैत्री बनाउने दिशामा मन्त्रालय प्रतिबद्ध रहेको स्पष्ट पारेका छन्।

यसैबीच, अपेक्षाअनुसार नतिजा प्राप्त गर्न नसकेका विद्यार्थीलाई निराश नहुन आग्रह गर्दै मन्त्रीले “एउटा परीक्षाले मात्र जीवनको सम्पूर्ण भविष्य निर्धारण गर्दैन” भन्ने सन्देश दिएका छन्। धैर्यता, आत्मविश्वास र पुनः प्रयासको साहस नै सफलताको आधार हुने उल्लेख गर्दै उनले नयाँ उत्साहका साथ अघि बढ्न विद्यार्थीलाई प्रेरित गरेका छन्।

शिक्षा क्षेत्रमा देखिएको यो ‘समयमै नतिजा’ मोडल अब अन्य तहका परीक्षामा समेत विस्तार हुन सके, नेपालको परीक्षा प्रणालीप्रति बढ्दो असन्तुष्टि कम गर्न सहयोग पुग्ने अपेक्षा गरिएको छ।