काठमाडौं — सरकारले पेट्रोलियम आपूर्तिमा देखिएको समस्या समाधानका लागि सरकारी कार्यालय र शैक्षिक संस्थामा शनिबार र आइतबार बिदा दिने निर्णय गरेको छ। आइतबार बसेको मन्त्रिपरिषद् बैठकले उक्त निर्णय गरेको हो।
बैठकले आगामी चैत २३ गतेदेखि लागू हुनेगरी दुई दिन बिदा दिने निर्णय गरेको जनाइएको छ। यससँगै सरकारी कार्यालयको समय बिहान ९ बजेदेखि साँझ ५ बजेसम्म कायम गरिएको छ।
त्यस्तै, सरकारले डिजिटल नेपाल ट्रान्सफर्मेशन परियोजनाका लागि एशियाली विकास बैंक र विश्व बैंकबाट कुल ९० मिलियन अमेरिकी डलर बराबरको सहुलियतपूर्ण ऋण स्वीकार गर्ने निर्णय गरेको छ। यसअन्तर्गत एशियाली विकास बैंकबाट ४० मिलियन डलर र विश्व बैंकबाट ५० मिलियन डलर प्राप्त हुनेछ।
यसबाहेक दिगो तथा समावेशी वित्त परियोजनाका लागि विश्व बैंकबाट थप ९५ मिलियन डलर ऋण लिने निर्णय पनि गरिएको छ।
मन्त्रिपरिषद्ले सरकारी निकायहरूको संगठन तथा व्यवस्थापन सर्वेक्षणका लागि पूर्वस्वीकृति दिएको छ भने राष्ट्रिय समाचार समितिका कार्यकारी अध्यक्ष धर्मेन्द्र झाले दिएको राजीनामा स्वीकृत गरेको छ।
त्यस्तै, सरकारले डिजेल तथा पेट्रोलबाट चल्ने सवारी साधनलाई विद्युतीयमा रूपान्तरण गर्ने कानुनी व्यवस्था मिलाउने निर्णय पनि गरेको छ।
आगामी शैक्षिक सत्र २०८३ वैशाख १५ गतेदेखि सुरु गर्ने निर्णयसमेत बैठकले गरेको छ।