काठमाडौं –८ वर्षको लामो पर्खाइपछि आएको बहुप्रतीक्षित चलचित्र ‘माग्ने राजा’ आजदेखि देशभरका हलहरूमा प्रदर्शनमा आएको छ। निर्देशक ऋषि लामिछाने निर्देशित यो फिल्मलाई पहिलो दिनमै दर्शकको उत्साहजनक प्रतिक्रिया मिल्न थालेको छ।

फिल्म हेरेर निस्किएका धेरै दर्शकले यसलाई केवल हाँसाउने चलचित्र नभई सोच्न बाध्य बनाउने कथा भएको टिप्पणी गरेका छन्। कतिपयले माग्ने बुढालाई यसपटक एकदमै फरक अवतारमा पाएको अनुभव बाँडेका छन्।

ट्रेलर र गीत सार्वजनिक हुँदा नै लाखौं भ्युज बटुलेको ‘माग्ने राजा’ प्रदर्शनसँगै हलतर्फ दर्शकको फ्लो बढिरहेको छ। पहिलो शोमै हल भरिभराउ भएको रिपोर्ट आएको छ, र सामाजिक सञ्जालमा पनि फिल्मबारे प्रशंसा बढिरहेको छ।

निर्देशक लामिछानेले यसलाई आफ्नै जीवनको गहिरो सपना भनेका छन् र दर्शकसँग फिल्मलाई आफ्नो फिल्मझैँ अनुभव गर्न आह्वान गरेका छन्।

‘माग्ने राजा’ अहिले देशभरका हलहरूमा लागिरहेको छ र सकारात्मक प्रतिक्रियाले यसलाई वर्षकै चर्चित नेपाली फिल्ममध्ये एक बनाउने अपेक्षा गरिएको छ।