काठमाडौँ । सुनसरीलगायतका विभिन्न जिल्लाहरूमा हालै विकसित अत्यन्तै संवेदनशील तथा दुःखद घटनाक्रम र त्यसले उत्पन्न गरेको असहज परिस्थितिको समीक्षा गर्दै राजनीतिक दलहरूले देशवासीलाई सामाजिक सद्भाव र शान्ति कायम राख्न जोडदार अपिल गरेका छन्। राष्ट्रिय स्वतन्त्र पार्टी (रास्वपा) का सभापति रवि लामिछानेको आह्वानमा बुधबार बसेको सर्वदलीय बैठकले घटनाको निष्पक्ष छानबिन गरी दोषीमाथि कारबाही गर्न र पीडितलाई उचित क्षतिपूर्ति दिन सरकारको गम्भीर ध्यानाकर्षण गराएको छ।

बैठकपछि जारी संयुक्त वक्तव्यमा नागरिकको जिउधनको रक्षा गर्नु राज्यको प्राथमिक दायित्व भएको स्मरण गराउँदै परिस्थिति सामान्य बनाउन सरकारले अधिकतम संयमता अपनाउनुपर्नेमा जोड दिइएको छ। घटनामा ज्यान गुमाउने मृतकहरूप्रति श्रद्धाञ्जली व्यक्त गर्दै शोकाकुल परिवारजनमा समवेदना प्रकट गरिएको छ भने घाइते नागरिक तथा सुरक्षाकर्मीहरूको शीघ्र स्वास्थ्य लाभको कामना गरिएको छ।

समाजमा शान्ति र सहअस्तित्व कायम राख्न केन्द्रीय प्रयास मात्र पर्याप्त नहुने निष्कर्ष निकाल्दै बैठकले प्रदेश, जिल्ला र स्थानीय तहसम्मै तत्काल सर्वदलीय तथा सर्वपक्षीय बैठकहरू आयोजना गर्न आ-आफ्ना पार्टी पंक्तिलाई निर्देशन दिएको छ। तल्लो तहसम्म संवाद पुर्‍याउन स्थानीय स्तरका धार्मिक अगुवा, नागरिक समाज र स्थानीय प्रशासनलाई समेत जोडेर शान्ति स्थापनाका लागि सक्रिय गराइने वक्तव्यमा उल्लेख छ।

यसैगरी, लोकतन्त्रमा जस्तोसुकै जटिल असन्तुष्टिको समाधान पनि शान्तिपूर्ण संवाद र सहमतिका माध्यमबाट मात्र सम्भव हुने भन्दै आफ्ना माग र असन्तुष्टिहरू शान्तिपूर्ण रूपमा राख्न सम्बन्धित सबै पक्षलाई आह्वान गरिएको छ। आवेग र मुठभेडले समस्या थप जटिल बनाउने भएकाले बहुसांस्कृतिक सहिष्णुता र भाइचारा नमार्न देशवासीलाई आग्रह गरिएको छ।

संवेदनशील समयमा सामाजिक सञ्जालमार्फत फैलन सक्ने भ्रामक समाचार, घृणास्पद अभिव्यक्ति र अफवाहले स्थितिलाई थप भयावह बनाउन सक्ने भन्दै सामाजिक सञ्जालको जिम्मेवार प्रयोग गर्न आम नागरिकलाई अनुरोध गरिएको छ। साथै, सञ्चारमाध्यमहरूलाई समेत संयमित र तथ्यपरक सूचना मात्र सम्प्रेषण गरिदिन आग्रह गरिएको छ। यस्ता घटना भविष्यमा देशका कुनै पनि भू-भागमा दोहोरिन नदिन केन्द्रीय तहबाट निरन्तर समन्वय, अनुगमन र नेतृत्वदायी भूमिका निर्वाह गर्न सबै राजनीतिक दलहरू एकताबद्ध रहने प्रतिबद्धता व्यक्त गरेका छन्।