काठमाडौँ । लाइफ कम्प्युटरद्वारा आयोजित ‘वेबसाइट निर्माण प्रतियोगिता – सिजन ८’ को सम्पूर्ण तयारी पूरा भएको छ। एसइई (SEE) दिएर बसेका विद्यार्थीहरूको प्राविधिक क्षमता र सिर्जनशीलतालाई उजागर गर्ने उद्देश्यका साथ सञ्चालित यस प्रतियोगिताको अन्तिम नतिजा भोलि (असार २० गते) होटल हार्दिक, काठमाडौँमा एक भव्य समारोहका बीच घोषणा गरिने भएको छ।
प्रतियोगिताको अन्तिम चरणको तयारीबारे जानकारी दिँदै कार्यक्रम संयोजक लक्ष्मी खत्रीले छनोट प्रक्रिया अत्यन्त प्रतिस्पर्धात्मक र पारदर्शी रहेको बताउनुभयो। खत्रीका अनुसार, देशभरका सहभागीहरूबाट सुरुमा टप २० मा छनोट भएका विद्यार्थीहरूलाई पुनः आईटी विज्ञहरूको टोलीको प्रत्यक्ष निगरानीमा राखिएको थियो। उक्त समूहले आफ्नो वेबसाइटलाई थप परिमार्जित (Refine) गरेपछि अन्तिम टप १० विद्यार्थीको छनोट गरिएको हो।

छनोटमा परेका उत्कृष्ट १० विद्यार्थीहरू निम्नानुसार छन्:
१. अङ्किता भट्टराई — क्लिन्टन स्कुल, चाबहिल
२. कृती परियार — मदन स्मारक सेकेन्डरी स्कुल, पुल्चोक
३. सन्देश बुढाथोकी — ललित सेकेन्डरी बोर्डिङ स्कुल, ललितपुर
४. स्नेहा राई — कोभेन्ट एकेडेमी, ललितपुर
५. प्रतीक श्रेष्ठ — अमृत सेकेन्डरी बोर्डिङ स्कुल, मैपी
६. आशिष श्रेष्ठ — अमृत सेकेन्डरी स्कुल, मैपी
७. वीरेन्द्र श्रेष्ठ — भगवानी इङ्लिस सेकेन्डरी स्कुल
८. दिविसा शिल्पकार — आइडियल मोडल स्कुल, जावलाखेल
९. सोना महर्जन — लिटल एन्जेल्स स्कुल, हात्तीवन
१०. प्रतिस प्रजापति — न्यू जेनिथ स्कुल, काठमाडौँ
संयोजक खत्रीले भन्नुभयो, “टप १० मा पर्न सफल विद्यार्थीहरूले २४ घण्टाको समयसीमाभित्र कोडिङलगायतका विभिन्न प्राविधिक चुनौतीहरू पूरा गर्दै वेबसाइट तयार पारेका छन्। उनीहरूले सबमिट गरेका प्रोजेक्टहरूको सूक्ष्म मूल्याङ्कन गरी फिनाले कार्यक्रममै प्रथम, द्वितीय र तृतीय स्थान घोषणा गर्दै पुरस्कृत गरिनेछ।”
विगत आठ वर्षदेखि निरन्तर सञ्चालन हुँदै आएको यो प्रतियोगिता विद्यार्थीहरूका लागि प्रविधि र करियरको भविष्य कोर्ने एक विश्वसनीय प्लेटफर्म बनेको छ। किताबको सिद्धान्तलाई व्यवहारमा उतार्न चाहने विद्यार्थीहरूका लागि यो प्रतिस्पर्धा एक सुनौलो अवसर साबित भएको छ।
वि.सं. २०६८ देखि सूचना प्रविधिको क्षेत्रमा सक्रिय लाइफ कम्प्युटर, आईटी (IT) प्रशिक्षणको एक अग्रणी संस्था हो। बागबजारमा मुख्य कार्यालय रहेको यस संस्थाले हाल ललितपुरको कुमारीपाटी र काठमाडौँको सोह्रखुट्टेमा समेत शाखा विस्तार गरी सेवा प्रदान गर्दै आएको छ। सफ्टवेयर विकास, मोबाइल एप निर्माण, वेब डिजाइन, यूआई/यूएक्स डिजाइन तथा ग्राफिक मल्टिमिडिया जस्ता क्षेत्रमा व्यावहारिक तालिम दिने लाइफ कम्प्युटर, नेपालको आईटी क्षेत्रमा करियर बनाउन चाहने विद्यार्थीहरूका लागि भरपर्दो गन्तव्य बनेको छ।