काठमाडौँ — शिक्षा, विज्ञान तथा प्रविधि तथा युवा तथा खेलकुद मन्त्रालयको जिम्मेवारीसमेत सम्हालेका मन्त्री सस्मित पोखरेलको सम्पत्ति विवरण सार्वजनिक भएको छ। प्रधानमन्त्री तथा मन्त्रिपरिषद् कार्यालयले आइतबार सार्वजनिक गरेको विवरणअनुसार पोखरेल र उनको परिवारको नाममा देशका विभिन्न स्थानमा करिब ७ ठाउँमा करिब साढे २० करोड रुपैयाँ मूल्य बराबरको घरजग्गा रहेको उल्लेख छ।

सम्पत्ति विवरणअनुसार काठमाडौं, मोरङ र ललितपुरलगायत स्थानमा परिवारका सदस्यहरूको संयुक्त नाममा घरजग्गा रहेको छ। ती सम्पत्तिमा बुवा, आमा, मावली हजुरआमा तथा दिदीबहिनीहरूको समेत नाम समावेश रहेको जनाइएको छ।

मन्त्री पोखरेलको कुल सम्पत्ति २४ करोड १६ लाख २७ हजार रुपैयाँ रहेको विवरणमा उल्लेख छ। त्यसमा अचल सम्पत्तिसँगै बैंक मौज्दात, सुनचाँदी तथा अन्य लगानी पनि समावेश गरिएको छ। विवरणअनुसार २५ तोला सुन र करिब १०० तोला चाँदी पनि रहेको उल्लेख छ।

वित्तीय विवरणमा पोखरेलको नाममा बैंक खातामा ४ लाख ४७ हजार ९९४ रुपैयाँ मौज्दात रहेको तथा डलर खातामा ५ अमेरिकी डलर रहेको देखाइएको छ। पारिवारिक सदस्यहरूको संयुक्त लगानीमा शेयर तथा बचतपत्रमा पनि लगानी रहेको विवरणमा उल्लेख छ।

त्यसैगरी, पोखरेल र उनकी आमाको नाममा ७५ लाख रुपैयाँ ऋण रहेको जनाइएको छ। उक्त ऋण हिमालयन बैंक र माछापुच्छ्रे बैंकमार्फत लिइएको विवरणमा उल्लेख छ।

सम्पत्ति विवरणअनुसार मन्त्री पोखरेलको खुद सम्पत्ति २३ करोड ४१ लाख २७ हजार रुपैयाँ रहेको देखिएको छ। कानुनी व्यवस्था अनुसार मन्त्रीहरूले पदभार सम्हालेपछि सम्पत्ति विवरण सार्वजनिक गर्नुपर्ने प्रावधानअनुसार यो विवरण सार्वजनिक गरिएको हो।