काठमाडौँ । नेपाल शैक्षिक परामर्श संघ (ECAN) को आगामी केन्द्रीय निर्वाचनका लागि उमा खड्का पाठकले केन्द्रीय कोषाध्यक्ष पदमा आफ्नो उम्मेदवारी औपचारिक रूपमा घोषणा गरेकी छन्। यही पौष २८ गते सम्पन्न हुन लागेको निर्वाचनमार्फत ECAN को नयाँ केन्द्रीय नेतृत्व चयन हुँदैछ।
हाल ECAN को केन्द्रीय समितिमा केन्द्रीय सदस्यका रूपमा सक्रिय रहेकी पाठक शैक्षिक परामर्श व्यवसायलाई व्यवस्थित, मर्यादित र दीर्घकालीन रूपमा सशक्त बनाउने अभियानमा लामो समयदेखि संलग्न रहँदै आएकी छन्। उनी यसअघि एक कार्यकाल कार्यसमिति सदस्यका रूपमा काम गरिसकेकी छन् भने हाल CSR विभाग तथा ECAN USA विभागको जिम्मेवारी सम्हाल्दै संस्थागत सुदृढीकरण, सामाजिक उत्तरदायित्व, क्षमता विकास र आर्थिक अनुशासनमा उल्लेखनीय योगदान पुर्‍याउँदै आएकी छन्।
कोषाध्यक्ष पदमा उम्मेदवारी घोषणा गर्दै पाठकले निर्वाचित भएमा ECAN को आर्थिक व्यवस्थापनलाई अझ पारदर्शी, उत्तरदायी र प्रणालीगत बनाउने प्रतिबद्धता व्यक्त गरेकी छन्। संस्थाको आम्दानी–खर्च नियमित र स्पष्ट रूपमा सदस्यहरूसमक्ष प्रस्तुत गर्ने, आर्थिक निर्णयलाई नीतिगत तथा दीर्घकालीन सोचका आधारमा अघि बढाउने र ECAN लाई आर्थिक रूपमा आत्मनिर्भर तथा सबल संस्थाका रूपमा विकास गर्ने उनको मुख्य प्राथमिकता रहने उल्लेख छ।
साथै केन्द्र र शाखाबीचको आर्थिक समन्वय सुदृढ गर्ने, सदस्य–मैत्री आर्थिक नीति विकास गर्ने, CSR कार्यक्रमलाई संस्थागत रूपमा विस्तार गर्ने तथा उपलब्ध स्रोतसाधनलाई ७०० भन्दा बढी सदस्यहरूको हितमा अधिकतम उपयोग हुने गरी परिचालन गर्ने उनको प्रतिबद्धता रहेको छ।
ECAN लाई केवल आर्थिक रूपमा सक्षम मात्र नभई विश्वसनीय, अनुशासित र सुशासनयुक्त संस्था बनाउने लक्ष्यसहित सबै कार्यसमितिसँग सहकार्य गर्दै जिम्मेवारीपूर्वक काम गर्ने पाठकले बताइन्। उनले आगामी निर्वाचनमा सम्पूर्ण सदस्यहरूको विश्वास, साथ र अमूल्य मतको अपेक्षा गरेकी छन्।