काठमाडौँ – काठमाडौँ महानगरपालिकाका उपप्रमुख सुनिता डंगोलका अनुसार विपद् व्यवस्थापनमा संघ, प्रदेश र स्थानीय सरकारबीच समन्वय आवश्यक छ। उनका अनुसार नागरिकको जीवन र सम्पत्तिको सुरक्षा सुनिश्चित गर्न खोज, उद्धार, राहत तथा पुनःस्थापनाका प्रत्येक चरणमा जनशक्ति, स्रोत र साधनको एकीकृत प्रयोग हुनुपर्छ।

शुक्रबार रानीपोखरीमा महानगर प्रहरी बल, सशस्त्र प्रहरी बल नेपाल २४ नं. गुल्म हेडक्वाटर र नेपाल प्रहरीले संयुक्तरूपमा आयोजना गरेको मनसुनजन्य विपद् प्रतिकार्य संयुक्त कृतिम अभ्यासको अवलोकनपछि डंगोलले यस्तो धारणा व्यक्त गरेकी हुन्।

उनका अनुसार विपद् अवस्था आएको बेलामा सबैभन्दा पहिला नागरिकको सम्पर्कमा पर्ने तह स्थानीय सरकार हो, त्यसैले स्थानीय तहको तयारी निर्णायक हुने गर्दछ। “महानगरपालिकाले यो दायित्व वहन गर्न नीति, योजना, कार्यक्रम र बजेटमार्फत तयारी गरिरहेको छ,” भन्ने उनको भनाइ छ।

उनको भनाइमा, विपद्को समयमा विभिन्न सुरक्षासंस्थाहरूको भूमिकालाई प्रभावकारी बनाउने खालको अभ्यास आवश्यक छ। यस्तो अभ्यासले विपद् प्रतिकार्य क्षमतामा सुधार ल्याउने विश्वास उनले व्यक्त गरिन्।

कार्यक्रममा बाढी, पहिरो, उद्धार र प्राथमिक उपचारसम्बन्धी विभिन्न अभ्यासहरू प्रस्तुत गरिएका थिए।