काठमाडौँ। नेपाली कांग्रेसको १५औँ महाधिवेशनले यतिबेला पूरै देशको राजनीतिक माहोल तताएको छ। नयाँ नेतृत्वको पर्खाइमा रहेका कांग्रेस कार्यकर्ता र आम चासोबीच आज (मंगलबार) मनोनयन दर्ताको महत्त्वपूर्ण प्रक्रिया सुरु हुँदैछ।

केन्द्रीय निर्वाचन समितिले तय गरेको संशोधित तालिकाअनुसार, कांग्रेसको केन्द्रीय नेतृत्वमा पुग्न चाहने नेताहरूले आज दिउँसो १२:३० बजेदेखि बेलुकी ४ बजेसम्म आफ्नो उम्मेदवारी दर्ता गराउन सक्नेछन्।

यस्तो छ आजको चुनावी कार्यतालिका:

बिहान ९:३० बजेसम्म : मतदाता नामावलीमा दाबी–विरोध गर्ने समय।

बिहान ९:३० देखि १०:३० सम्म : परेका दाबी–विरोधमाथि निर्वाचन समितिद्वारा छानबिन तथा जाँचबुझ।

बिहान ११:३० बजे : मतदान गर्न पाउने प्रतिनिधिहरूको अन्तिम नामावली प्रकाशन।

दिउँसो १२:३० देखि ४ बजेसम्म : केन्द्रीय कार्यसमितिका विभिन्न पदहरूमा मनोनयन दर्ता।

समितिका सदस्य सचिव राजु कटुवालका अनुसार उम्मेदवारी दर्ताबाहेक महाधिवेशनका अन्य सम्पूर्ण कार्यक्रमहरू भने यसअघि तोकिएकै तालिका बमोजिम निरन्तर अगाडि बढ्नेछन्।