महिला सशक्तीकरणको आधारस्तम्भ आर्थिक सबलीकरण हो’-उर्मिला श्रेष्ठ

काठमाडौं – नेपाल चेम्बर अफ कमर्सकी उपाध्यक्ष एवम् नेपाल महिला चेम्बरकी अध्यक्ष उर्मिला श्रेष्ठले महिला सशक्तीकरणको आधार स्तम्भ आर्थिक सबलीकरण रहेको उल्लेख गर्दै महिलाले आफूलाई आत्मनिर्भर बनाउन अग्रसर हुनुपर्नेमा जोड दिएकी छिन् । बुधबार युजिसा इन्टरनेशनलद्वारा राष्ट्रिय नाच घर जमलमा आयोजित मिसेस नेपाल कल्चर प्रतियोगितामा प्रमुख अतिथिको आसनबाट बोल्दै श्रेष्ठले उक्त धारणा राखेकी हुन् । कोभिडपश्चात् अर्थतन्त्र शिथिल भइरहेको अवस्थामा यस्ता कार्यक्रमले प्रगगि र उत्साह दुवै बढाउने औंल्याउँदै श्रेष्ठले हरेक पेशा व्यवसायको आफनै महत्व हुने हुँदा सबैले कोही कसैमाथि भेदभाव नराखी सम्मानजनक व्यवहार गर्नुपर्नेमा जोड दिए । ‘कुनै चिज पनि ठुला साना हुँदैनन्, कसैप्रति पनि भेदभाव गर्नु हुँदैन, काम सानो ठुलो भन्ने हुँदैन, म यहि मान्यता राख्छु र यहाँहरुलाई पनि यहि आग्रह गर्दछु ’ उनले भने । उनले मिसेस नेपाल कल्चर विवाहित महिलाहरुको स्वतन्त्रता साथै व्यक्तित्व विकाससँग जोडिएकोले यसलाई मनोरञ्जनसँग मात्रै जोडन नमिल्ने जिकिर पेश गर्दै भनिन्, ‘मिसेस नेपाल कल्चर चाही मलाई किन राम्रो लाग्यो भने यो समाजमा महिला विवाहित भएपछि वा बच्चालाई जन्म दिईसकेपछि महिलाहरु स्वतन्त्र र खुला हुन सक्दैनन् भन्ने जुन विश्वास समाजमा व्याप्त छ यस्ता कुराहरुलाई चिर्दै महिलाहरु संचारिका, मोडल आदि पेशामा वा कुनै क्षेत्रमा अगाडि आउन सक्छ भन्ने गतिलो उदाहरण हो’ । त्यस्तै उनले नारी माथि हुने हिंसासँगै पुरुषमाथि गरिने हिंसा पनि निन्दनिय रहने बताउनुहुँदै नारीले नारीमाथि गर्ने अन्याय र हिंसाका घटना उस्तै विकराल रहेको औंल्याइन्। सो अवसरमा मन स्वच्छ भएमात्रै मानिस पूर्ण रुपमा सुन्दर हुने धारणा समेत व्यक्त गरिन्। प्रमुख अतिथि श्रेष्ठले संचारकर्मी सरोज ओझा, युवा व्यवसायी डेभिल सिंह राजपुत, काठमाडौं उद्योग वाणिज्य संघका सदस्य एवम् आईआईएफटीका संचालक तेन्जिङ शेर्पा, गायक विनोद ढकाल लगायतलाई प्रमाण पत्र वितरण गरेकी थिइन् । उक्त प्रतियोगिता कार्यक्रममा पूर्व मिस नेपालद्वय रुबि राणा र सुगारिका केसी, संचारकर्मी मनोज जोशी लगायत निर्यायक थिए।