शंखरापुरका सय दिनको काम – निःशूल्क स्वास्थ्य, शिक्षा कृषि र पर्यटन विकाससम्म

काठमाडौं – काठमाडौंको शंखरापुर नगरपालिकाले १ सय दिनको कार्यप्रगति सार्वजनिक गरेको छ । बुधबार साँखुमा गरिएको नवनिर्वाचित जनप्रतिनिधिहरुको १०० दिने उपलब्धी सार्वजनिकीकरण कार्यक्रममा नगरप्रवक्ता राधाकृष्ण श्रेष्ठले प्रगति विवरण प्रस्तुत गरेका छन् । सय दिनको अवधीमा नगरवासीलाई निःशूल्क स्वास्थ्य, शिक्षाको व्यवस्था गरिएको उनले बताएका छन् । गर्भवती महिला, जेष्ठ नागरिकका लागि निःशूल्क एम्बुलेन्स सेवा, साँखुमा रहेको सुष्मा कोइराला मेमोरियल अस्पतालसँग द्विपक्षीय सम्झौता गरी ७ प्रकारका उपचार सेवा निःशूल्क तथा ११ वटा उपचार सेवामा ३० देखि ६० प्रतिशत सहुलियत छुटमा स्वास्थ्य सेवाको व्यवस्था गरिएको जानकारी गराएका छन् । इन्द्रायणी नगर अस्पतालबाट स्वास्थ्य विमा कार्यक्रम लागू गरिएको र मेयरसँग निःशूल्क घरदैलो स्वास्थ्य सेवा कार्यक्रमको सूरुवात गरिएको उनले जानकारी गराए । यस्तै शिक्षा तर्फ कक्षा ११ को शिक्षा निःशूल्क गरिएको छ भने स्थानीय मातृभाषा ‘नेपाल भाषा र तामाङ भाषा’मा पाठ्यक्रम तयारी कार्यदल गठन भएको जानकारी गराएका छन् । सो अवसरमा बोल्दै नगरपालिकाका प्रमुख प्रशासकीय अधिकृत बासुदेव खनालले जनप्रतिनिधिहरु, कर्मचारी, सुरक्षाकर्मी, राजनीतिक दलका प्रतिनिधि, समाजसेवी लगायतको सामुहिक प्रयासबाट मात्रै शंखरापुर नगरपालिकाको समृद्धि, सुशासन र विकास संभव रहेको बताए । यस्तै नगरप्रमुख रमेश नापितले शंखरापुर नगरपालिकालाई फोहोर मुक्त सफा स्वच्छ नगरपालिका बनाउन, पर्यटन र कृषिको माध्यमबाट समृद्धि हासिल गर्न, विकासका पूर्वाधार निर्माण गरेर नगरबासीको जीवनयापन सहज बनाउन लागिपरेको बताए । उनले आफूले निर्वाचनका बेला गरेको प्रतिवद्धता अनुसार निःशूल्क स्वास्थ्य र शिक्षाको कार्यक्रम कार्यान्वयनमा लगिसकेको जानकारी दिए । गत स्थानीय तहको निर्वाचनमा शंखरापुर नगरपालिकामा राप्रपाले विजय हासिल गरेको थियो । यस्तो छ शंखरापुर नगरपालिकाले १०० दिनमा हासिल गरेको महत्वपूर्ण केही कामहरु ः स्वास्थ्य सम्बन्धी १) गर्भवती महिला तथा ६० वर्ष माथिका जेष्ट नागरिकहरुलाई निःशूल्क एम्बुलेन्स सेवाको व्यवस्था गरिएको । २) सुष्मा कोइराला मेमोरियला अस्पतालसँग द्विपक्षीय सम्झौता गरी ७ वटा निःशुल्क तथा ११ वटा ३० देखि ६० प्रतिशत सहुलियत छुटमा स्वास्थ्य सेवाको व्यवस्था गरिएको निःशूल्क सव बहानको व्यवस्था गरिएको ३) मेयरसँग निःशुल्क घरदैलो स्वास्थ्य सेवा कार्यक्रम शुरुवात भएको । ४) इन्द्रायणी नगर अस्पतालबाट स्वास्थ्य विमा कार्यक्रमको शुभारम्भ भएको । ५) जर्मन सरकारको सहयोगमा वडा नं ७ कठनचोकमा अस्पताल निर्माणको प्रक्रिया अगाडी बढेको विकास साझेदारहरुको आर्थिक सहयोगमा एम्बुलेन्स खरिद प्रक्रिया अगाडी बढेको । कृषि तथा पशुपंक्षी सम्बन्धी ६) बागमती प्रदेश सरकारले ५५ मेट्रिक टन रसायनिक मलको कोटा निर्धारण गरेकोमा नगरपालिकाको विशेष पहलमा १७९ मेट्रिक टन मलको कोटा बृद्धि गर्न सफल भएको । ७) कृषि विकास कार्ययोजना तयारीको प्रक्रिया अगाडी बढेको । ८) बागमती प्रदेश सरकारको लगानीमा वडा नं ३ मा पशु स्वास्थ्य क्लिनिक सञ्चालनको प्रक्रिया अगाडी बढेको । पर्यटन सम्बन्धी ९) नगरस्तरीय एकीकृत पर्यटकीय गुरुयोजना तयारीको प्रक्रिया अगाडी बढेको । शिक्षा सम्बन्धी १०) सामुदायिक विद्यालयमा माध्यमिक तह कक्षा ११ मा निःशूल्क भर्नाको व्यवस्था गरिएको । ११) स्थानीय मातृभाषा नेपाल भाषा र तामाङ भाषामा पाठ्यक्रम तयारी कार्यदल गठन भएको । वातावरण तथा विपद सम्बन्धी १२) ल्याण्डफिलको व्यवस्थापनको लागि नगरपालिकामा ल्याण्डफिल सम्भाव्यं स्थानको खोजी गरी उपयुक्त विकल्पमा फोहोर व्यवस्थापन गर्ने प्रयास भैइरहेको । १३) आईई गरी तोकिएको क्षेत्रबाट मात्र ढङ्गा, गिट्टी बालुवा उठाउने व्यवस्था मिलाइएको । १४) विपद व्यवस्थापन तथा रोकथामको लागि त्रिपाल वितरण तथा आर्थिक सहयोग गरिएको । सामाजिक समावेशीकरण सम्बन्धी १५) बाबु आमा विहिन बालबालिकाहरुलाई पोषण शैक्षिक सामग्री र रु ४हजारका दरले उपलब्ध गराइएको । १६) सामाजिक समावेशीकरणका लागि विभिन्न किसिमका जनचेतनामुलक तथा सीपमुलक तालिम सञ्चालन गरिएको । सहकारी सम्बन्धमा १७) नगरपालिका भित्रका सहकारी संस्थाहरुलाई वित्तीय जोखिमका क्षेत्रहरु, लेखापालन र सहकारी संस्थाको व्यवस्थापन सम्बन्धी सघन तालिम दिई संस्थागत सुदृढीकरण गर्ने गरिएको । विविध १८) जापान, चीन लगायत युरोपियन मुलुकहरुका नगरपालिकासँग भगिनीसम्बन्ध स्थापित गर्न प्रारम्भिक चरणको पहल भएको । १९) भूमि वर्गीकरण कार्य सम्पन्न गरिएको । २०) सम्पदा बस्ती भित्रका घरहरु निर्माणको लागि प्रति घर रु १ लाखमा रु २५ हजार थप गरी नगरपालिकाबाट उपलब्ध गराइएको । २१) नगरस्तरीय समीक्षा कार्यक्रम सम्पन्न गरिएको । २२) नगरपालिकाका विभिन्न वडाका सार्वजनिक जग्गाको लगत सङ्कलन कार्य अन्तिम चरणमा रहेको । २३) वडामा काम गर्ने इन्जिनियरिङ सेवाको प्राविधिकहरुबाट घ वर्गको निःशुल्क नक्सा निर्माणको व्यवस्था गरिएको । २४) काठमाडौं उपत्यका खानेपानी व्यवस्थापन बोर्डको लगानीमा साँखु खानेपानी तथा सरसफाई उपभोक्ता समितिको भवन निर्माण प्रक्रिया अगाडी बढेको । २५) अपराधिक तथा विविध गतिविधिहरुको निगरानी गर्न वडाका विभिन्न क्षेत्रहरुमा सि. सि. टि.भि. क्यामरा जडान गरिएको ।