सुरती योगमा आध्यात्मिक साधना 

काठमाडौं– समाचार कक्ष र क्यामेराको अघिपछि डौडिँदै झण्डै ४० वर्ष सक्रिय पत्रकारिता गरेका वरिष्ठ पत्रकार तीर्थ कोइराला सुन्तला रंगको गाउनमा आध्यात्मिक भजनमा मस्त झुमिरहेका देखिन्थे । ओशोधारा नेपालको हेपाली हाइट साधना केन्द्रमा शुक्रवार, शनिवार र आइतवार तीन दिने सुरती योगमा सहभागी कोइराला सँगै युवा पत्रकार अमृत तिमल्सिना, बैकर दीपेश मैनाली, सरकारी कर्मचारी र व्यवसायीहरु पनि सुन्तला रंगको गाउनमा सजिएर घरी ध्यान र समाधीमा मस्त थिए भने घरीघरी साधना संगीतमा झुमिरहेका थिए । सुरती योगको ध्यान र समाधीमा लीन कोइराला, तिमल्सिना र मैनाली जस्तै पचासभन्दा बढीले नेपालका ध्यानकेन्द्रबाट सुरती योग सम्पन्न गरेका छन् । 

काठमाडौं र भक्तपुर साधना केन्द्रसहित भारतका विभिन्न राज्य गरी सहित १२ ठाउँबाट एकसाथ सम्पन्न भएको सुरती योग समापन कार्यक्रममा बोल्दै वरिष्ठ पत्रकार कोइरालाले बढी जनसम्पर्क हुने पत्रकारिता लगायतका पेशा र राजनीतिमा संलग्न हुनेलाई यस्तो ध्यान आवश्यक भएको बताए । कोइरालाले जेलमा रहेका नागरिक र निराशा तथा असन्तुष्टि बोकेर बसेकाहरुलाई ध्यान योगको कार्यक्रम आधारभूत स्वास्थ्य प्याकेजकै रूपमा उपलब्ध गराउनेतर्फ सरोकारवालाको ध्यानाकर्षण गराउन आफू लाग्ने बताए । 

पत्रकार तिमल्सिनाले आलोचनात्मक दृष्टिकोण राख्नेका लागि र सन्तुलित जीवनका लागि ध्यान आवश्यक भएको बताए । ध्यानले लिक छोडेको जीवनलाई समेत लिकमा ल्याउन सहयोग गर्ने तिमल्सिनाले विश्वास व्यक्त गरे । ध्यान योगको एक सत्र समर्थगुरू सिद्धार्थ औलियाले सञ्चालन गरेका थिए ।

काठमाडौं साधना केन्द्रमा साधनारत प्रज्ञान अर्याल, राजु बराल, भावना भट्टराई, पुष्पा निरौला लगायतले ध्यान तथा समाधीले आफ्नो जीवनशैली सहज भएको र रचनात्मकता वृद्धि भएको धारणा व्यक्त गरे । कार्यक्रममा प्रस्तुत भएका समाधि विधि, सुमिरन योग, आनपानसति योग र प्रिती योगमार्फत पचासभन्दा बढी सहभागीले दिव्य नाद एवम् निरंकारको अनुभूतिमार्फत योग र समाधिको गहिराईको अनुभव लिएका छन् । आचार्य डा प्रद्युम्नराज पाण्डे, आचार्य डा नम्रता पाण्डे, इन्जिनियर अनन्त विष्ट, आचार्य पूजारी र आचार्य सूर्य सापकोटाले नेपालका साधनाकेन्द्रमा कार्यक्रमलाई प्रस्तुत गरेका थिए ।