निर्देशक ऋषि लामिछानेले निर्देशन गर्ने फिल्मको नाम जुर्यो ‘माग्ने राजा’

काठमाडौं – निर्देशक ऋषि लामिछानेले निर्माण गर्न लागेको चलचित्रको नाम जुरेको छ । हाँस्य कलाकार केदार घिमिरे (माग्ने बुढा)को प्रमुख भूमिका रहने उक्त चलचित्रको नाम ‘माग्ने राजा’ राखिएको बताइएको छ । चलचित्रको निर्माण युनिटले सार्वजनिक गरेको पोस्टरमार्फत यो जानकारी दिइएको हो ।

‘माग्ने राजा’लाई मुनाल घिमिरेले निर्माण गर्नेछन् । सामीप्यराज तिमल्सिनाले लेखेको यो चलचित्र कमेडी चलचित्र हुने बताइएको छ । चलचित्रको छायाङ्कन आगामी फागुन १ गतेबाट सुरु हुने तयारी छ । ‘माग्ने राजा’ मार्फत निर्देशक ऋषि लामिछाने आठ वर्षपछि निर्देशनमा फर्किएका हुन् । पछिल्लो पटक उनले सन् २०१६ मा ‘किस्मत २’ निर्देशन गरेका थिए । केही दिन अघि ‘माग्ने राजा’को शीर्ष अभिनेत्रीमा वर्षा सिवाकोटी अनुबन्धित भएकी छन् ।