एनपीएलमा सुदूरपश्चिम रोयल्सको प्रायोजक नेपाल टेलिकम

काठमाडौं – आगामी मंसिर १५ गतेदेखि काठमाडौंमा आयोजना हुने ‘नेपाल प्रिमियर लिग (एनपीएल)’ को प्रथम संस्करणमा सहभागी टोली सुदूरपश्चिम रोयल्स र नेपाल टेलिकमबीच प्रायोजनसम्बन्धी सम्झौता भएको छ ।

नेपाल टेलिकम, केन्द्रीय कार्यालयमा मंगलवार सम्पन्न उक्त समझदारी अनुरुप एनपीएल प्रतियोगिता २०८१ मा सुदूरपश्चिम रोयल्स टिमको टेलिकम पार्टनरको रूपमा नेपाल टेलिकमले भूमिका निभाउने बताइएको छ। उक्त समझदारीपत्रमा टेलिकमका कम्पनीका प्रबन्ध निर्देशक संगीता पहाडी अर्याल तथा सुदूरपश्चिम रोयल्स टिमका प्रमुख कार्यकारी अधिकृत प्रकाश खड्काले हस्ताक्षर गरेका छन्।

कार्यक्रममा नेपाल टेलिकमका प्रबन्ध निर्देशक पहाडी अर्यालले नेपालको खेलकुद क्षेत्रको वृहत्तर विकासका लागि नेपाल टेलिकमले सदैव योगदान दिदैं आएको र नेपाली क्रिकेटसँग पनि लामो समयदेखि जोडिइरहेको सन्दर्भ उल्लेख गर्दै सुदूरपश्चिम रोयल्स मार्फत एनपीएल २०८१ मा जोडिन पाउँदा खुशी लागेको बताइन्।

उनले एनपीएल २०८१ मार्फत नेपाली क्रिकेटले नयाँ उचाई प्राप्त गर्ने र यो प्रतियोगिता नेपाली खेलकुद विकासक्रमकै महŒवपूर्ण कोशेढुङ्गाको रूपमा स्थापित हुने बताउँदै सुदूरपश्चिमाञ्चल रोयल्स टिमलाई सहकार्यका लागि हार्दिक आभारका साथै प्रतियोगितामा सफलताको लागि शुभकामना पनि व्यक्त गरिन्।