रामजी ज्ञवाली निर्देशित ‘लापत्ता सन्तान’ को फर्स्ट लुक पोस्टर सार्वजनिक
काठमाडौं– डकुमेन्ट्री सर्ट फिल्म ’लापत्ता सन्तान’को फर्स्ट लुक पोस्टर सार्वजनिक गरिएको छ। रामजी ज्ञवालीद्वारा लिखित, निर्देशन र निर्माण गरिएको यो फिल्मले बेपत्ता बालबालिकाको मार्मिक विषयवस्तुमा आधारित कथालाई प्रस्तुत गरेको बताइएको छ ।
फिल्मको कथाले आफ्ना हराएका सन्तानको खोजीमा निस्केका अभिभावकको हृदयविदारक भावनात्मक संघर्षलाई उजागर गरेको पोस्टरबाट अनुमान गर्न सकिन्छ। तथापि निर्माण पक्षले फिल्मले उठाएका पक्षका बारेमा धारणा राखेको छैन।
निर्देशक ज्ञवालीले केही दिन पछि टिजर सार्वजनिक गरेर यसका विषयमा केही रहस्य खुल्ने बताए । उनले विभिन्न कारण आस्रम पुगेका वुवा आमा र सन्तानको कथा उठान गरिएको संकेत भने गरे।
पोस्टरमा प्रमुख कलाकारहरू रश्मी भट्ट, ओजस्वी विक्रम विष्ट, आशिष पराजुली, सबिना राउत, निलम भट्ट, र मनिष पी निरौला देख्न सकिन्छ। निरज कंडेलको डिओपी र नहकुल खड्काको सम्पादनमा तयार भएको फिल्मको कलर संयोजन राजेन्द्र मोक्तानले गरेका हुन् ।
निर्देशक ज्ञवालीले केही वर्षदेखि डकुमेन्ट्री, डकुमेन्ट्री सर्ट फिल्म, र म्युजिक भिडियो निर्माण गर्दै आएका छन्। उनको पटकथा र निर्देशनमा बनेको ’रित्तो गाउँ’ नामक डकुमेन्ट्री सर्ट फिल्मलाई त्रिभुवन विश्वविद्यालयको अध्ययननमा केन्द्रित रहेर तयार पारिएको थियो । ’रित्तो गाउँ’ विशेष शो र फेस्टिवलहरूको लागि लक्षित गरिएको हुँदा अहिलेसम्म युट्युबमा सार्वजनिक गरिएको छैन।
लामो समय पत्रकारितामा जमेका ज्ञवालीले सक्रिय पत्रकारिता छाडेर निर्देशनमा लागेका हुन् । उनले यसअघि ’डार्क मुन’, ’एक लभर’, ’आराध्या’, र ’हनिमुन’ जस्ता सर्ट फिल्महरू पनि निर्माण गरिसकेका छन् ।